bata ai mauj-e-dil hone ko hai kya

batā ai mauj-e-dil hone ko hai kyā

matā-e-naqd-e-jāñ khone ko hai kyā

thakan se chuur kyoñ saarā badan hai

safar kā iḳhtitām hone ko hai kyā

hameñ kyoñ niiñd sī aane lagī hai

shab-e-hijrāñ sahar hone ko hai kyā

ḳhudā ābād rakkhe aap kā ġham

na ho ye ġham to phir rone ko hai kyā

zamīñ banjar na daana hai na paanī

tamanna ke sivā bone ko hai kyā

ham apnā bojh ab tak Dho rahe haiñ

tumhārā bojh bhī Dhone ko hai kyā

gañvā dī zindagī kār-e-abas meñ

hamāre paas ab khone ko hai kyā

jo honā thā vo sab kuchh ho chukā hai

na jaane aur ab hone ko hai kyā

zamīñ ḳhāmosh hai aur āsmāñ chup

kisī din dekhnā hone ko hai kyā

bata ai mauj-e-dil hone ko hai kya

mata-e-naqd-e-jaan khone ko hai kya

thakan se chur kyon sara badan hai

safar ka iKHtitam hone ko hai kya

hamein kyon nind si aane lagi hai

shab-e-hijran sahar hone ko hai kya

KHuda aabaad rakkhe aap ka gham

na ho ye gham to phir rone ko hai kya

zamin banjar na dana hai na pani

tamanna ke siwa bone ko hai kya

hum apna bojh ab tak Dho rahe hain

tumhaara bojh bhi Dhone ko hai kya

ganwa di zindagi kar-e-abas mein

hamare pas ab khone ko hai kya

jo hona tha wo sab kuchh ho chuka hai

na jaane aur ab hone ko hai kya

zamin KHamosh hai aur aasman chup

kisi din dekhna hone ko hai kya