bata muhaqqiq ki tha bhi koi wujud-e-kaun-o-makan se pahle

batā muhaqqiq ki thā bhī koī vujūd-e-kaun-o-makāñ se pahle

kisī kā honā huā bhī sābit sabāt-e-har-do-jahāñ se pahle

chaman ke ham bhī the rahne vaale ḳhudā kisī kā na ghar ujāḌe

hamāre ghar bhī thā rashk-e-jannat magar thā daur-e-ḳhizāñ se pahle

qafas meñ merā jo saañs ukhḌā fuġhāñ kā us ko gumān guzrā

zabān kaaTī hai us ne merī sitam to dekho fuġhāñ se pahle

hamārī rif'at kā pūchhnā kyā kabhī the ḳhuld-e-barīñ ke sākin

hamārā rutba malā.ika se sivā thā naql-e-makāñ se pahle

jahān Duubā to kyā karūñ maiñ rulāyā hotā na tum ne mujh ko

ḳhabar maiñ tūfāñ kī de chukā thā tumheñ bhī ashk-e-ravāñ se pahle

juḌe the qismat se chaar tinke falak kī āñkhoñ meñ vo bhī khaTke

mujhe hai khaTkā ki phir nasheman kahīñ na ujḌe ḳhizāñ se pahle

tumhāre vā'de kā kyā bharosa yaqīñ hai ham ko na hogā iifā

phiroge ab bhī zabāñ se apnī phire the jaise zabāñ se pahle

na haar dekhī na jiit apnī samāyā saudā kuchh aisā sar meñ

butoñ se dil kī lagā.ī baazī hisāb-e-sūd-o-ziyāñ se pahle

hayāt apnī rafīq niklī lagāyā us ne 'rasā' Thikāne

vahīñ pe le jā ke mujh ko chhoḌā chalī thī le kar jahāñ se pahle

bata muhaqqiq ki tha bhi koi wujud-e-kaun-o-makan se pahle

kisi ka hona hua bhi sabit sabaat-e-har-do-jahan se pahle

chaman ke hum bhi the rahne wale KHuda kisi ka na ghar ujaDe

hamare ghar bhi tha rashk-e-jannat magar tha daur-e-KHizan se pahle

qafas mein mera jo sans ukhDa fughan ka us ko guman guzra

zaban kaTi hai us ne meri sitam to dekho fughan se pahle

hamari rif'at ka puchhna kya kabhi the KHuld-e-barin ke sakin

hamara rutba malaika se siwa tha naql-e-makan se pahle

jahan Duba to kya karun main rulaya hota na tum ne mujh ko

KHabar main tufan ki de chuka tha tumhein bhi ashk-e-rawan se pahle

juDe the qismat se chaar tinke falak ki aankhon mein wo bhi khaTke

mujhe hai khaTka ki phir nasheman kahin na ujDe KHizan se pahle

tumhaare wa'de ka kya bharosa yaqin hai hum ko na hoga ifa

phiroge ab bhi zaban se apni phire the jaise zaban se pahle

na haar dekhi na jit apni samaya sauda kuchh aisa sar mein

buton se dil ki lagai bazi hisab-e-sud-o-ziyan se pahle

hayat apni rafiq nikli lagaya us ne 'rasa' Thikane

wahin pe le ja ke mujh ko chhoDa chali thi le kar jahan se pahle