batao kaise zamane ka KHun-baha doge

batāo kaise zamāne kā ḳhūñ-bahā doge

jo bujh ga.e haiñ charāġh un ko kyā jalā doge

tumhārā kyā hai har ik naam ko miTā doge

jo sach kahegā use daar par chaḌhā doge

nazar uThā ke na dekhoge aañkh ke aañsū

kahānī sun ke ġharīboñ kī muskurā doge

tumhārā tarz-e-takallum batā rahā hai mujhe

tabāh logoñ ko jiine kā aasrā doge

agar kahūñgī kisī roz ġham kā afsāna

hañsī hañsī meñ mirī baat ko uḌā doge

balā se jaan pe bantī hai is zamāne meñ

na.e nizām kī tasvīr to banā doge

Darā rahā hai mujhe vo jahāñ se 'shā.ista'

batāo hazrat-e-nāseh ko kyā sazā doge

batao kaise zamane ka KHun-baha doge

jo bujh gae hain charagh un ko kya jala doge

tumhaara kya hai har ek nam ko miTa doge

jo sach kahega use dar par chaDha doge

nazar uTha ke na dekhoge aankh ke aansu

kahani sun ke gharibon ki muskura doge

tumhaara tarz-e-takallum bata raha hai mujhe

tabah logon ko jine ka aasra doge

agar kahungi kisi roz gham ka afsana

hansi hansi mein meri baat ko uDa doge

bala se jaan pe banti hai is zamane mein

nae nizam ki taswir to bana doge

Dara raha hai mujhe wo jahan se 'shaista'

batao hazrat-e-naseh ko kya saza doge