batao kis tarah pahunche ho shab ko tum Thikane par

batāo kis tarah pahuñche ho shab ko tum Thikāne par

mujhe to kuchh bharosā bhī nahīñ hai is zamāne par

batāo kaun thā kis ne jalā Daalā tumhārā ghar

parinda bhī nazar rakhtā hai apne āshiyāne par

na jaane kis tarah hoñge yahāñ hālāt behtar ab

yahāñ to saañp baiThe haiñ jidhar dekho ḳhazāne par

mujhe mālūm hai mujh ko diyā hai zahr tū ne hī

bharosā kyā karūñ ab yaar tere dostāne par

ye ham se dushmanī terī samajh meñ hī nahīñ aatī

faqat ham ahl-e-dil hī rahte haiñ tere nishāne par

koī aisā fasāna tū sunā ai ham-safar mujh ko

haqīqat kā gumāñ hone lage tere fasāne par

abhī bhī vaqt hai 'zebī' agar chāho to lauT aao

yahāñ bhī naam likkhā hai tumhārā daane daane par

batao kis tarah pahunche ho shab ko tum Thikane par

mujhe to kuchh bharosa bhi nahin hai is zamane par

batao kaun tha kis ne jala Dala tumhaara ghar

parinda bhi nazar rakhta hai apne aashiyane par

na jaane kis tarah honge yahan haalat behtar ab

yahan to sanp baiThe hain jidhar dekho KHazane par

mujhe malum hai mujh ko diya hai zahr tu ne hi

bharosa kya karun ab yar tere dostane par

ye hum se dushmani teri samajh mein hi nahin aati

faqat hum ahl-e-dil hi rahte hain tere nishane par

koi aisa fasana tu suna ai ham-safar mujh ko

haqiqat ka guman hone lage tere fasane par

abhi bhi waqt hai 'zebi' agar chaho to lauT aao

yahan bhi nam likkha hai tumhaara dane dane par