batata hai mujhe aaina kaisi be-ruKHi se

batātā hai mujhe ā.īna kaisī be-ruḳhī se

ki maiñ mahrūm hotā jā rahā huuñ raushnī se

kise ilzām duuñ maiñ rā.egāñ hone kā apne

ki saare faisle maiñ ne kiye ḳhud hī ḳhushī se

har-ik lamhe mujhe rahtī hai taaza ik shikāyat

kabhī tujh se kabhī ḳhud se kabhī is zindagī se

mujhe kal tak bahut ḳhvāhish thī ḳhud se guftugū kī

maiñ chhuptā phir rahā huuñ aaj apne-āp hī se

vo be-kaifī kā aalam hai ki dil ye chāhtā hai

kahīñ rū-posh ho jā.ūñ achānak ḳhāmushī se

sukūn-e-ḳhāna-e-dil ke liye kuchh guftugū kar

ajab hañgāma barpā hai tirī lab-bastagī se

ta.alluq kī yahī sūrat rahegī kyā hamesha

maiñ ab uktā chukā huuñ terī is vāraftagī se

jo chāhe vo sitam mujh par ravā rakkhe ye duniyā

mujhe yuuñ bhī tavaqqo.a ab nahīñ kuchh bhī kisī se

tire hone na hone par kabhī phir soch lūñgā

abhī to maiñ pareshāñ huuñ ḳhud apnī hī kamī se

rahā vo multafit merī taraf aur in dinoñ meñ

ḳhud apnī samt dekhe jā rahā be-ḳhudī se

koī ḳhush-fikr sā tāza-suḳhan bhī darmiyāñ rakh

kahāñ tak dil ko bahlā.ūñ maiñ terī dilkashī se

karam terā ki ye mohlat mujhe kuchh din kī baḳhshī

magar maiñ tujh se ruḳhsat chāhtā huuñ aaj hī se

vo din bhī the tujhe maiñ vālihāna dekhtā thā

ye din bhī haiñ tujhe maiñ dekhtā huuñ bebasī se

abhī 'irfān' āñkhoñ ko bahut kuchh dekhnā hai

tumheñ be-rañg kyuuñ lagne lagā hai sab abhī se

batata hai mujhe aaina kaisi be-ruKHi se

ki main mahrum hota ja raha hun raushni se

kise ilzam dun main raegan hone ka apne

ki sare faisle main ne kiye KHud hi KHushi se

har-ik lamhe mujhe rahti hai taza ek shikayat

kabhi tujh se kabhi KHud se kabhi is zindagi se

mujhe kal tak bahut KHwahish thi KHud se guftugu ki

main chhupta phir raha hun aaj apne-ap hi se

wo be-kaifi ka aalam hai ki dil ye chahta hai

kahin ru-posh ho jaun achanak KHamushi se

sukun-e-KHana-e-dil ke liye kuchh guftugu kar

ajab hangama barpa hai teri lab-bastagi se

talluq ki yahi surat rahegi kya hamesha

main ab ukta chuka hun teri is waraftagi se

jo chahe wo sitam mujh par rawa rakkhe ye duniya

mujhe yun bhi tawaqqoa ab nahin kuchh bhi kisi se

tere hone na hone par kabhi phir soch lunga

abhi to main pareshan hun KHud apni hi kami se

raha wo multafit meri taraf aur in dinon mein

KHud apni samt dekhe ja raha be-KHudi se

koi KHush-fikr sa taza-suKHan bhi darmiyan rakh

kahan tak dil ko bahlaun main teri dilkashi se

karam tera ki ye mohlat mujhe kuchh din ki baKHshi

magar main tujh se ruKHsat chahta hun aaj hi se

wo din bhi the tujhe main walihana dekhta tha

ye din bhi hain tujhe main dekhta hun bebasi se

abhi 'irfan' aankhon ko bahut kuchh dekhna hai

tumhein be-rang kyun lagne laga hai sab abhi se