bataun main taDapne ka maza kya

batā.ūñ maiñ taḌapne kā mazā kyā

nahīñ dekhā hai tum ne aa.ina kyā

zamīñ tāñbe kī hotī jā rahī hai

savā neze pe sūraj aa gayā kyā

hamāre ḳhuuñ kī laalī kyā batā.ūñ

muqābil is ke ho rang-e-hinā kyā

baḌhī kyoñ aag is tezī se ghar meñ

diyā ham-sāya ne is ko havā kyā

judā har shaḳhs kā rasta huā jab

to kahne sunñe kā kuchh fā.eda kyā

isī se ābrū-e-zindagī hai

ga.ī izzat to baaqī hī rahā kyā

bhare haiñ kaan dushman ne tumhāre

kahā kyā us ne aur tum ne sunā kyā

ġhazal sun lo zabāñ 'māhir' kī dekho

samajhne se hī pahle marhabā kyā

bataun main taDapne ka maza kya

nahin dekha hai tum ne aaina kya

zamin tanbe ki hoti ja rahi hai

sawa neze pe suraj aa gaya kya

hamare KHun ki lali kya bataun

muqabil is ke ho rang-e-hina kya

baDhi kyon aag is tezi se ghar mein

diya ham-saya ne is ko hawa kya

juda har shaKHs ka rasta hua jab

to kahne sunne ka kuchh faeda kya

isi se aabru-e-zindagi hai

gai izzat to baqi hi raha kya

bhare hain kan dushman ne tumhaare

kaha kya us ne aur tum ne suna kya

ghazal sun lo zaban 'mahir' ki dekho

samajhne se hi pahle marhaba kya