bayan-e-haal ko arz-e-talab samajhte hain

bayān-e-hāl ko arz-e-talab samajhte haiñ

vo log jin kā hai da.avā ki sab samajhte haiñ

sahīh ho ke ġhalat huuñ yahī ḳhatā merī

ki maiñ jo huuñ vo mujhe log kab samajhte haiñ

maiñ jin ke vahm-o-gumāñ ko faroġh detā huuñ

mujhe haqīr vo ḳhud ke sabab samajhte haiñ

tamām aib mujhī ko dikhā.ī dete haiñ

so mere dost mujhī ko ajab samajhte haiñ

sabaq hameñ bhī milā hai koī zarūr ki ham

jo kuchh na pahle samajhte the ab samajhte haiñ

zamīñ ho ḳhushk to fasleñ nahīñ ugā kartīñ

is ek baat ko dariyā ke lab samajhte haiñ

kisī kī zaat se vāqif koī nahīñ 'rāhat'

agarche sab yahāñ nām-o-nasab samajhte haiñ

bayan-e-haal ko arz-e-talab samajhte hain

wo log jin ka hai dawa ki sab samajhte hain

sahih ho ke ghalat hun yahi KHata meri

ki main jo hun wo mujhe log kab samajhte hain

main jin ke wahm-o-guman ko farogh deta hun

mujhe haqir wo KHud ke sabab samajhte hain

tamam aib mujhi ko dikhai dete hain

so mere dost mujhi ko ajab samajhte hain

sabaq hamein bhi mila hai koi zarur ki hum

jo kuchh na pahle samajhte the ab samajhte hain

zamin ho KHushk to faslen nahin uga kartin

is ek baat ko dariya ke lab samajhte hain

kisi ki zat se waqif koi nahin 'rahat'

agarche sab yahan nam-o-nasab samajhte hain