bayan ho kis tarah soz-o-alam ki dastan meri

bayāñ ho kis tarah soz-o-alam kī dāstāñ merī

na sāthī koī suntā hai na mīr-e-kārvāñ merī

mirā shauq-e-takallum mujh ko kis mahfil meñ le aayā

yahāñ to baat karne ko tarastī hai zabāñ merī

zabāñ par sabt gar mohr-e-sitamgar hai to kyā ġham hai

ki merī ḳhāmushī hī ban rahī hai ab zabāñ merī

mujhe ai bāġhbāñ shikva ho kyoñ qaid-o-salāsil kā

ki ab saare chaman kī dāstāñ hai dāstāñ merī

nishāñ to miT gayā sayyād mere āshiyāne kā

chaman meñ har taraf bikhrī hai ḳhāk-e-āshiyāñ merī

kuchh aisā soz pinhāñ thā mire andāz-e-girya meñ

chaman vāloñ ne mil kar luuT lī tarz-e-fuġhāñ merī

jahāñ meñ kis tarah mujh ko sukūn-e-qalb hāsil ho

banī hai zindagī hī jab sarāpā imtihāñ merī

merī sahrā-navardī par na ho hairān ai hamdam

abhī hai ārzū-e-ābla-pā.ī javāñ merī

ye dil hai yā ki hai nākām ummīdoñ kā gahvāra

ki har ḳhvāhish hai hasrat-ḳhez har hasrat javāñ merī

'sa.īd' apnā vatan har aan hī āñkhoñ meñ rahtā hai

usī kī yaad goyā ban ga.ī hai jān-e-jāñ merī

bayan ho kis tarah soz-o-alam ki dastan meri

na sathi koi sunta hai na mir-e-karwan meri

mera shauq-e-takallum mujh ko kis mahfil mein le aaya

yahan to baat karne ko tarasti hai zaban meri

zaban par sabt gar mohr-e-sitamgar hai to kya gham hai

ki meri KHamushi hi ban rahi hai ab zaban meri

mujhe ai baghban shikwa ho kyon qaid-o-salasil ka

ki ab sare chaman ki dastan hai dastan meri

nishan to miT gaya sayyaad mere aashiyane ka

chaman mein har taraf bikhri hai KHak-e-ashiyan meri

kuchh aisa soz pinhan tha mere andaz-e-girya mein

chaman walon ne mil kar luT li tarz-e-fughan meri

jahan mein kis tarah mujh ko sukun-e-qalb hasil ho

bani hai zindagi hi jab sarapa imtihan meri

meri sahra-nawardi par na ho hairan ai hamdam

abhi hai aarzu-e-abla-pai jawan meri

ye dil hai ya ki hai nakaam ummidon ka gahwara

ki har KHwahish hai hasrat-KHez har hasrat jawan meri

'said' apna watan har aan hi aankhon mein rahta hai

usi ki yaad goya ban gai hai jaan-e-jaan meri