bayan ho nahin sakti kisi se shan-e-ghazal

bayān ho nahīñ saktī kisī se shān-e-ġhazal

adab meñ jalva-e-sad-rang hai jahān-e-ġhazal

zamīn-e-sher kā sadqa ki hai bharā puurā

hazār-rang sitāroñ se āsmān-e-ġhazal

haiñ us kī silk meñ ash.ār-e-tāb-dār anjum

hai kahkashāñ se sivā husn-e-kahkashān-e-ġhazal

us āb-rūd ke qurbāñ ki jis meñ dhul dhul kar

kañval khilātī hai taḳh.īl kī zabān-e-ġhazal

hudūd-band zabāneñ samajh se duur sahī

bahut hī sahl hai sab ke liye zabān-e-ġhazal

tirī zabān samajhtā na ho jahāñ koī

vahāñ to bol ke tū dekh bar zabān-e-ġhazal

ye shoḳh-o-shang hai kāfir magar muaddab hai

buland rahtā na varna kabhī nishān-e-ġhazal

chalā thā jab bhī thī dhaj us kī dekhne kī chiiz

hai ab bhī qābil-e-nazzāra kārvān-e-ġhazal

hazār josh uThe ḳhanjar-āzmā ho kar

magar vo chhū bhī nahīñ paa.e farq-e-shān-e-ġhazal

jo mārte rahe patthar vo nīm-vahshī the

jab aaya hosh to dekhā vahīñ makān-e-ġhazal

shaguft-e-gul pe bhalā kis kā zor chaltā hai

kisī se band na hogā kabhī dahān-e-ġhazal

bayan ho nahin sakti kisi se shan-e-ghazal

adab mein jalwa-e-sad-rang hai jahan-e-ghazal

zamin-e-sher ka sadqa ki hai bhara pura

hazar-rang sitaron se aasman-e-ghazal

hain us ki silk mein ashaar-e-tab-dar anjum

hai kahkashan se siwa husn-e-kahkashan-e-ghazal

us aab-rud ke qurban ki jis mein dhul dhul kar

kanwal khilati hai taKHil ki zaban-e-ghazal

hudud-band zabanen samajh se dur sahi

bahut hi sahl hai sab ke liye zaban-e-ghazal

teri zaban samajhta na ho jahan koi

wahan to bol ke tu dekh bar zaban-e-ghazal

ye shoKH-o-shang hai kafir magar muaddab hai

buland rahta na warna kabhi nishan-e-ghazal

chala tha jab bhi thi dhaj us ki dekhne ki chiz

hai ab bhi qabil-e-nazzara karwan-e-ghazal

hazar josh uThe KHanjar-azma ho kar

magar wo chhu bhi nahin pae farq-e-shan-e-ghazal

jo marte rahe patthar wo nim-wahshi the

jab aaya hosh to dekha wahin makan-e-ghazal

shaguft-e-gul pe bhala kis ka zor chalta hai

kisi se band na hoga kabhi dahan-e-ghazal