bayan kar dard chashm-e-tar hamara

bayāñ kar dard chashm-e-tar hamārā

kahīñ gum ho gayā hai ghar hamārā

salāmat is liye hai sar hamārā

qasīda paḌhte haiñ patthar hamārā

kahāñ ho chāñd-tāro tum kahāñ ho

tumhārā muntazir hai ghar hamārā

laḌakpan aaj bhī zinda hai ham meñ

machal uThtā hai dil aksar hamārā

abhī taarī hai chehroñ par udāsī

abhī badlā nahīñ manzar hamārā

maraz qaabū se bāhar ho gayā thā

na rotā kaise chārāgar hamārā

musāfir haiñ kahīñ bhī so raheñge

hamāre saath hai bistar hamārā

na jaane kyā ḳhatā ham se huī hai

sunā hai zikr hai ghar ghar hamārā

koī to daad de jī bhar ke ham ko

koī to sher ho behtar hamārā

miTā sakte nahīñ ham ko añdhere

bahut ujlā hai pas-manzar hamārā

karishma dekhiye ḳhush-qāmatī kā

na Takrāyā kisī se sar hamārā

sab ahl-e-ḳhāna haiñ kamre ke andar

janāza rakkhā hai bāhar hamārā

anā kā aa.ina dhuñdlā gayā jab

to nikhrā aur bhī 'jauhar' hamārā

bayan kar dard chashm-e-tar hamara

kahin gum ho gaya hai ghar hamara

salamat is liye hai sar hamara

qasida paDhte hain patthar hamara

kahan ho chand-taro tum kahan ho

tumhaara muntazir hai ghar hamara

laDakpan aaj bhi zinda hai hum mein

machal uThta hai dil aksar hamara

abhi tari hai chehron par udasi

abhi badla nahin manzar hamara

maraz qabu se bahar ho gaya tha

na rota kaise chaaragar hamara

musafir hain kahin bhi so rahenge

hamare sath hai bistar hamara

na jaane kya KHata hum se hui hai

suna hai zikr hai ghar ghar hamara

koi to dad de ji bhar ke hum ko

koi to sher ho behtar hamara

miTa sakte nahin hum ko andhere

bahut ujla hai pas-manzar hamara

karishma dekhiye KHush-qamati ka

na Takraya kisi se sar hamara

sab ahl-e-KHana hain kamre ke andar

janaza rakkha hai bahar hamara

ana ka aaina dhundla gaya jab

to nikhra aur bhi 'jauhar' hamara