bazm be-rabt hai soz-e-ahang se git ulfat ke gane se kya faeda

bazm be-rabt hai soz-e-āhang se giit ulfat ke gaane se kyā fā.eda

baaġh sadiyoñ se be-nūr hai dilrubā terā yuuñ gul khilāne se kyā fā.eda

ham bhī aa.e ga.e is jahāñ meñ magar koī ham ko na ham sā milā hai kabhī

jis meñ koī bhī dil rakhne vaalā na ho us jahāñ meñ samāne se kyā fā.eda

jo mohabbat samajhtā ho kartā bhī ho vo hai phirtā liye apne tishna se lab

jo mohabbat na samjhe magar bech de us ko sharbat pilāne se kyā fā.eda

tīrgī tīrgī hai idhar se udhar sham.a jalte hī ātish-fishāñ ghar huā

dil na raushan ho jab ilm ke nuur se apne ghar ko jalāne se kyā fā.eda

merī ulfat ko Thukrā ke tū chal basā merī chāhat samajh kar pashemāñ huā

jo haqīqat thī us ko to samjhā nahīñ ab kahānī banāne se kyā fā.eda

ye ḳhushī-o-masarrat kā aalam magar tū samajhtā hai merā muqaddar nahīñ

tujh ko hāsil huā hai na hogā kabhī merā yuuñ dil dukhāne se kyā fā.eda

nāseho apne ghar meñ bhī jhāñkā karo kitne haiñ jo taraste haiñ ulfat ko vaañ

dil jo sadiyoñ se ab tak mile hī nahīñ haath yuuñ hī milāne se kyā fā.eda

ham to samjhe the duniyā hai pīchhe vahāñ is liye aur aage hī baḌhte ga.e

DhūñDne vaale jaane kahāñ kho ga.e naqsh-e-pā yuuñ banāne se kyā fā.eda

vo tumhārā huā hai na hogā kabhī 'kāvish' aao zarā dekh lo tum magar

us ke dil par asar jab na kar paa.e tum shā.erī ke ḳhazāne se kyā fā.eda

bazm be-rabt hai soz-e-ahang se git ulfat ke gane se kya faeda

bagh sadiyon se be-nur hai dilruba tera yun gul khilane se kya faeda

hum bhi aae gae is jahan mein magar koi hum ko na hum sa mila hai kabhi

jis mein koi bhi dil rakhne wala na ho us jahan mein samane se kya faeda

jo mohabbat samajhta ho karta bhi ho wo hai phirta liye apne tishna se lab

jo mohabbat na samjhe magar bech de us ko sharbat pilane se kya faeda

tirgi tirgi hai idhar se udhar shama jalte hi aatish-fishan ghar hua

dil na raushan ho jab ilm ke nur se apne ghar ko jalane se kya faeda

meri ulfat ko Thukra ke tu chal basa meri chahat samajh kar pasheman hua

jo haqiqat thi us ko to samjha nahin ab kahani banane se kya faeda

ye KHushi-o-masarrat ka aalam magar tu samajhta hai mera muqaddar nahin

tujh ko hasil hua hai na hoga kabhi mera yun dil dukhane se kya faeda

naseho apne ghar mein bhi jhanka karo kitne hain jo taraste hain ulfat ko wan

dil jo sadiyon se ab tak mile hi nahin hath yun hi milane se kya faeda

hum to samjhe the duniya hai pichhe wahan is liye aur aage hi baDhte gae

DhunDne wale jaane kahan kho gae naqsh-e-pa yun banane se kya faeda

wo tumhaara hua hai na hoga kabhi 'kawish' aao zara dekh lo tum magar

us ke dil par asar jab na kar pae tum shaeri ke KHazane se kya faeda