bazm-e-hasti ko ba-sad-hasrat-e-tamir na dekh

bazm-e-hastī ko ba-sad-hasrat-e-tāmīr na dekh

sham.a se rabt baḌhā sham.a kī tanvīr na dekh

soz-e-fitrat kahīñ kāġhaz pe utar saktā hai

merā dil dekhne vaale mirī tasvīr na dekh

terī sharminda-nigāhī kī qasam hai tujh ko

kis ke siine meñ utartī hai ye shamshīr na dekh

toḌ saktā hai tilism-e-sahr-o-shām junūñ

tauq-e-gardan pe na jā paañv kī zanjīr na dekh

baare kaam aa to gayā ḳhūn-e-tamannā ai dost

mirā afsāna mirī shoḳhi-e-tahrīr na dekh

chhoḌ jaanā hai tujhe naqsh chaman meñ apnā

fikr-e-anjām na kar hāsil-e-tadbīr na dekh

tujh ko fitrat ke taqāzoñ kī ḳhabar kyā zāhid

dekh rahmat kī nigāheñ mirī taqsīr na dekh

dil kī har laġhzish-e-ma.asūm pe sau ḳhuld nisār

mastī-e-jurm samajh shorish-e-ta.azīr na dekh

dekh us ko ki jiye jaatā hai hañs hañs ke 'adīb'

mujh se pesh aatī hai kyūñkar mirī taqdīr na dekh

bazm-e-hasti ko ba-sad-hasrat-e-tamir na dekh

shama se rabt baDha shama ki tanwir na dekh

soz-e-fitrat kahin kaghaz pe utar sakta hai

mera dil dekhne wale meri taswir na dekh

teri sharminda-nigahi ki qasam hai tujh ko

kis ke sine mein utarti hai ye shamshir na dekh

toD sakta hai tilism-e-sahr-o-sham junun

tauq-e-gardan pe na ja panw ki zanjir na dekh

bare kaam aa to gaya KHun-e-tamanna ai dost

mera afsana meri shoKHi-e-tahrir na dekh

chhoD jaana hai tujhe naqsh chaman mein apna

fikr-e-anjam na kar hasil-e-tadbir na dekh

tujh ko fitrat ke taqazon ki KHabar kya zahid

dekh rahmat ki nigahen meri taqsir na dekh

dil ki har laghzish-e-masum pe sau KHuld nisar

masti-e-jurm samajh shorish-e-tazir na dekh

dekh us ko ki jiye jata hai hans hans ke 'adib'

mujh se pesh aati hai kyunkar meri taqdir na dekh