bazm-e-imkan mein koi mujh sa nazar-baz nahin

bazm-e-imkāñ meñ koī mujh sā nazar-bāz nahīñ

ye jigar dekh ki is par bhī mujhe naaz nahīñ

zulm kyā kartī tirī chashm-e-fusūñ-sāz nahīñ

ik achhūtī sī hayā kā mujhe andāz nahīñ

nāzish-e-barbat-e-dil dard hai āvāz nahīñ

hāmil-e-soz nahīñ taar to vo saaz nahīñ

aaj hāsil hai sukūñ mujh ko junūñ ke sadqe

ab kisī samt se aatī koī āvāz nahīñ

dāvar-e-'ishq ne baḳhshī hai vo masrūf-nazar

fikr-e-anjām nahīñ fursat-e-āġhāz nahīñ

kā'ba-e-husn meñ yuuñ dil nahīñ lagtā apnā

sūrat-e-nāz nahīñ sīrat-e-andāz nahīñ

'ain mastī hai bhalā kaun de zāhid ko javāb

jām-e-gul-rang to sharminda-e-āvāz nahīñ

haa.e sayyād ne āzād kiyā to us dam

jab ki baazū meñ mire jur.at-e-parvāz nahīñ

ik tabassum ke tasavvur meñ fidā jaan na kar

itnī tā’jīl abhī o dil-e-jāñ-bāz nahīñ

aap kī raat kyoñ āñkhoñ meñ kaTī kuchh samjhe

us kī lāThī meñ kahāvat hai ki āvāz nahīñ

jis meñ dushman bhī kare aarzū mar jaane kī

lutf-e-dil-dār se behtar koī e'jāz nahīñ

'shād' ik husn-e-tarah-dār kī 'ismat kī qasam

'ishq manzūr-e-haqīqat hai koī raaz nahīñ

bazm-e-imkan mein koi mujh sa nazar-baz nahin

ye jigar dekh ki is par bhi mujhe naz nahin

zulm kya karti teri chashm-e-fusun-saz nahin

ek achhuti si haya ka mujhe andaz nahin

nazish-e-barbat-e-dil dard hai aawaz nahin

hamil-e-soz nahin tar to wo saz nahin

aaj hasil hai sukun mujh ko junun ke sadqe

ab kisi samt se aati koi aawaz nahin

dawar-e-'ishq ne baKHshi hai wo masruf-nazar

fikr-e-anjam nahin fursat-e-aghaz nahin

ka'ba-e-husn mein yun dil nahin lagta apna

surat-e-naz nahin sirat-e-andaz nahin

'ain masti hai bhala kaun de zahid ko jawab

jam-e-gul-rang to sharminda-e-awaz nahin

hae sayyaad ne aazad kiya to us dam

jab ki bazu mein mere jurat-e-parwaz nahin

ek tabassum ke tasawwur mein fida jaan na kar

itni ta’jil abhi o dil-e-jaan-baz nahin

aap ki raat kyon aankhon mein kaTi kuchh samjhe

us ki laThi mein kahawat hai ki aawaz nahin

jis mein dushman bhi kare aarzu mar jaane ki

lutf-e-dil-dar se behtar koi e'jaz nahin

'shad' ek husn-e-tarah-dar ki 'ismat ki qasam

'ishq manzur-e-haqiqat hai koi raaz nahin