bazm-e-rang-o-bu ka hun main raazdan tanha

bazm-e-rañg-o-bū kā huuñ maiñ rāzdāñ tanhā

hai mirī zamīñ tanhā aur āsmāñ tanhā

rahravān-e-manzil hī jab bichhaḌ chuke saare

kyā karegā manzil par mīr-e-kārvāñ tanhā

rahguzar meñ yaksūī anjuman meñ tanhā.ī

ham tire tasavvur meñ the kahāñ kahāñ tanhā

zindagī kī rāheñ ab pur-ḳhatar haiñ is darja

aap chal nahīñ sakte do-qadam yahāñ tanhā

zauq-e-bandagī ho to bandagī ko kaafī haiñ

ik mirī jabīñ tanhā terā āstāñ tanhā

un se hāl-e-dil kahnā ai 'nasīr' lāzim hai

ḳhāmushī nahīñ hotī ġham kī tarjumāñ tanhā

bazm-e-rang-o-bu ka hun main raazdan tanha

hai meri zamin tanha aur aasman tanha

rahrawan-e-manzil hi jab bichhaD chuke sare

kya karega manzil par mir-e-karwan tanha

rahguzar mein yaksui anjuman mein tanhai

hum tere tasawwur mein the kahan kahan tanha

zindagi ki rahen ab pur-KHatar hain is darja

aap chal nahin sakte do-qadam yahan tanha

zauq-e-bandagi ho to bandagi ko kafi hain

ek meri jabin tanha tera aastan tanha

un se haal-e-dil kahna ai 'nasir' lazim hai

KHamushi nahin hoti gham ki tarjuman tanha