bazm-e-surud-e-KHuban mein go mardnagin shahin bajin

bazm-e-surūd-e-ḳhūbāñ meñ go mardnagīñ shāhīn bajīñ

saath faqīr kī Dholak ke par Dham-Dhamyāñ rañgīn bajīñ

nāla-kashī se raat jo gulshan rashk-e-bazm-e-ishrat thā

minqāreñ murġhān-e-chaman kī sub.h talak juuñ biin bajīñ

tujh se na kahtā thā maiñ zāhid mai-ḳhāne kī raah na chal

āḳhir tujh par raste hī meñ tāliyāñ o be-dīn bajīñ

maiñ jo nashe meñ raat huā ġhaTpaT us ma.ashūq kī chhātī saath

pāzebeñ paañv kī us ke kyā hī ba-sad tamkīn bajīñ

sham.a rahī shab jab tak jaltī mujh ko na aa.ī niiñd zarā

jhāñjheñ parvāne ke paroñ kī bas ki sar-e-bālīn bajīñ

balbe mizāj-e-nāzuk terā niiñd uchaT ga.ī us gul kī

bāliyāñ pattoñ se jo ulajh kar raat sar-e-bālīn bajīñ

va.ada kar ke jab vo na aayā sair-e-chaman ko dil ne kahā

raat ga.ī chal baaġh se ab ghaḌiyāñ to ka.ī ġhamgīn bajīñ

jī kā kuḌhānā mere thā manzūr magar ghaḌyāloñ kī

vasl kī shab jo tā-ba-sahar ghaḌyāleñ be-ā.īn bajīñ

DeḌh pahar Thahrūñgā ye kah ki yaar mire ghar aayā thā

par ghabrā ke jaane ko uTThā jūñhī pahar par tiin bajīñ

bāñg-e-hamīr se kam vo na samjhā bas ki nafīs-mizāj thā yaar

nāqūseñ but-ḳhānoñ meñ har chand ba-sad taz.īn bajīñ

aa.e bahtarī ho ke malā.ek mar jo gayā āshiq terā

naubateñ kyā kyā shādī kī marqad meñ dam-e-talqīn bajīñ

vasl kī shab āḳhir hone kā 'mus.hafī' dhaḌkā kyā maiñ kahūñ

jī hī gayā bas tan se nikal jab tiin pahar par tiin bajīñ

bazm-e-surud-e-KHuban mein go mardnagin shahin bajin

sath faqir ki Dholak ke par Dham-Dhamyan rangin bajin

nala-kashi se raat jo gulshan rashk-e-bazm-e-ishrat tha

minqaren murghan-e-chaman ki subh talak jun bin bajin

tujh se na kahta tha main zahid mai-KHane ki rah na chal

aaKHir tujh par raste hi mein taliyan o be-din bajin

main jo nashe mein raat hua ghaTpaT us mashuq ki chhati sath

pazeben panw ki us ke kya hi ba-sad tamkin bajin

shama rahi shab jab tak jalti mujh ko na aai nind zara

jhanjhen parwane ke paron ki bas ki sar-e-baalin bajin

balbe mizaj-e-nazuk tera nind uchaT gai us gul ki

baaliyan patton se jo ulajh kar raat sar-e-baalin bajin

wada kar ke jab wo na aaya sair-e-chaman ko dil ne kaha

raat gai chal bagh se ab ghaDiyan to kai ghamgin bajin

ji ka kuDhana mere tha manzur magar ghaDyalon ki

wasl ki shab jo ta-ba-sahar ghaDyalen be-ain bajin

DeDh pahar Thahrunga ye kah ki yar mere ghar aaya tha

par ghabra ke jaane ko uTTha junhi pahar par tin bajin

bang-e-hamir se kam wo na samjha bas ki nafis-mizaj tha yar

naqusen but-KHanon mein har chand ba-sad tazin bajin

aae bahtari ho ke malaek mar jo gaya aashiq tera

naubaten kya kya shadi ki marqad mein dam-e-talqin bajin

wasl ki shab aaKHir hone ka 'mushafi' dhaDka kya main kahun

ji hi gaya bas tan se nikal jab tin pahar par tin bajin