bazm-e-ulfat mein agar shamil na the

bazm-e-ulfat meñ agar shāmil na the

ham tumhārī yaad se ġhāfil na the

mehrbāñ tū thā hamāre haal par

ham hī tere pyaar ke qābil na the

likh diyā tū ne vafā ko mere naam

kyā jahāñ meñ aur ahl-e-dil na the

ham ne hī uljhā diyā har baat ko

zindagī ke marhale mushkil na the

karb kī takrār thī har saañs meñ

varna ham ḳhud apne hī qātil na the

ham rahe tūfān-e-ġham se 'āshnā'

mauj kī āġhosh meñ sāhil na the

bazm-e-ulfat mein agar shamil na the

hum tumhaari yaad se ghafil na the

mehrban tu tha hamare haal par

hum hi tere pyar ke qabil na the

likh diya tu ne wafa ko mere nam

kya jahan mein aur ahl-e-dil na the

hum ne hi uljha diya har baat ko

zindagi ke marhale mushkil na the

karb ki takrar thi har sans mein

warna hum KHud apne hi qatil na the

hum rahe tufan-e-gham se 'ashna'

mauj ki aaghosh mein sahil na the