bazm-e-yaran na rahi shahr-e-tamanna na raha

bazm-e-yārāñ na rahī shahr-e-tamannā na rahā

zindagī terā burā ho koī merā na rahā

aarzū kāsa-e-hasrat meñ Dhalī jaatī hai

dast-e-ummīd meñ baaqī koī sikka na rahā

tum se shikva nahīñ shikva hai zamāne se mujhe

na rahe tum to koī pūchhne vaalā na rahā

bām-o-dar bhī haiñ mayassar mujhe dastār bhī aaj

ye alag baat ki sar par koī saaya na rahā

is tarah apnā banāyā ġham-e-ulfat ne mujhe

ġham-e-duniyā ko bhī mujh se koī shikva na rahā

uTh gayā bazm-e-marāsim se dil-e-zār bhī ab

ek be-nām sā hotā thā jo rishta na rahā

be-navā kar gayā mujh ko bhī fareb-e-duniyā

lab-e-īqān pe jaarī koī kalma na rahā

kyā milā kār-e-masīhā.ī se āḳhir mujh ko

ġham bhī ġhairoñ ke hue dard bhī apnā na rahā

ḳhvāb-e-manzil the nishāñ jis kī masāfat meñ 'zahīr'

ham-safar mil ga.e āḳhir to vo rasta na rahā

bazm-e-yaran na rahi shahr-e-tamanna na raha

zindagi tera bura ho koi mera na raha

aarzu kasa-e-hasrat mein Dhali jati hai

dast-e-ummid mein baqi koi sikka na raha

tum se shikwa nahin shikwa hai zamane se mujhe

na rahe tum to koi puchhne wala na raha

baam-o-dar bhi hain mayassar mujhe dastar bhi aaj

ye alag baat ki sar par koi saya na raha

is tarah apna banaya gham-e-ulfat ne mujhe

gham-e-duniya ko bhi mujh se koi shikwa na raha

uTh gaya bazm-e-marasim se dil-e-zar bhi ab

ek be-nam sa hota tha jo rishta na raha

be-nawa kar gaya mujh ko bhi fareb-e-duniya

lab-e-iqan pe jari koi kalma na raha

kya mila kar-e-masihai se aaKHir mujh ko

gham bhi ghairon ke hue dard bhi apna na raha

KHwab-e-manzil the nishan jis ki masafat mein 'zahir'

ham-safar mil gae aaKHir to wo rasta na raha