bazm mein mujhse mila de koi parwane ko

bazm meñ mujh se milā de koī parvāne ko

ḳhuub samjhā.egā dīvāna hī dīvāne ko

sāqiyā uzr na kar piine de rindoñ ko yahīñ

kaun ghar bāñdh ke le jā.egā maiḳhāne ko

aap ke hausla-e-dil se to maiñ vāqif huuñ

is bhulāve meñ na suniye mire afsāne ko

ḳhāl-e-ruḳh us pe tire gesu-e-pur-pech kā jaal

murġh-e-dil kyoñ na phañse dekh le jab daane ko

vahshī āḳhir ko to vahshī hai na samjhegā kabhī

saarī duniyā agar aa.e use samjhāne ko

qissa-e-shām-e-alam kis ko sunā.e 'shabbīr'

paas tak koī biThātā nahīñ dīvāne ko

bazm mein mujh se mila de koi parwane ko

KHub samjhaega diwana hi diwane ko

saqiya uzr na kar pine de rindon ko yahin

kaun ghar bandh ke le jaega maiKHane ko

aap ke hausla-e-dil se to main waqif hun

is bhulawe mein na suniye mere afsane ko

KHal-e-ruKH us pe tere gesu-e-pur-pech ka jal

murgh-e-dil kyon na phanse dekh le jab dane ko

wahshi aaKHir ko to wahshi hai na samjhega kabhi

sari duniya agar aae use samjhane ko

qissa-e-sham-e-alam kis ko sunae 'shabbir'

pas tak koi biThata nahin diwane ko