be-aman raston pe ghabrae hue ye chehre

be-amāñ rastoñ pe ghabrā.e hue ye chehre

DhūñDhte kis ko haiñ uktā.e hue ye chehre

ab nahīñ māñgte biitī huī pahchān apnī

māñjh kar ret se chamkā.e hue ye chehre

jaan dene kī jagah jaan na de paa.e jo

phir kahāñ khilte haiñ murjhā.e hue ye chehre

jaane kis shām-e-javānī kī tamanna haiñ unheñ

chale haiñ zulfoñ ko bikhrā.e hue ye chehre

ab zamāne meñ rahe sāhib-e-idrāk kahāñ

pesh haiñ sāmne phuslā.e hue ye chehre

apnī hī mad.h-o-satā.ish meñ giraftār-o-asīr

phuul se logoñ ke sharmā.e hue ye chehre

ḳhud añdheroñ kī mulāqāt se Dar jaate haiñ

ḳhauf ke phandoñ pe lahrā.e hue ye chehre

ab bhī likhte haiñ mohabbat meñ qasīde har roz

siine se yādoñ ko lipTā.e hue ye chehre

be-aman raston pe ghabrae hue ye chehre

DhunDhte kis ko hain uktae hue ye chehre

ab nahin mangte biti hui pahchan apni

manjh kar ret se chamkae hue ye chehre

jaan dene ki jagah jaan na de pae jo

phir kahan khilte hain murjhae hue ye chehre

jaane kis sham-e-jawani ki tamanna hain unhen

chale hain zulfon ko bikhrae hue ye chehre

ab zamane mein rahe sahib-e-idrak kahan

pesh hain samne phuslae hue ye chehre

apni hi madh-o-sataish mein giraftar-o-asir

phul se logon ke sharmae hue ye chehre

KHud andheron ki mulaqat se Dar jate hain

KHauf ke phandon pe lahrae hue ye chehre

ab bhi likhte hain mohabbat mein qaside har roz

sine se yaadon ko lipTae hue ye chehre