be-barg-o-samar ho to shajar kaise kahunga

be-barg-o-samar ho to shajar kaise kahūñgā

phir dasht ko dariyā kā safar kaise kahūñgā

mar jaatī hai dab kar koī ḳhvāhish mire dil meñ

girtī huī dīvār ko ghar kaise kahūñgā

sad-parda-e-ḳhalvat meñ chamaktī hai mirī ruuh

dil meñ hai mire shams-o-qamar kaise kahūñgā

be-māya o be-kas hī sahī terī hayā huuñ

ho jaa.e tirī mujh pa nazar kaise kahūñgā

maiñ tire liye hijr kī ik bahtī havā huuñ

tū aa mujhe āġhosh meñ bhar kaise kahūñgā

ehsās ke bādal meñ chhupā hai koī sūraj

ye din kā ujālā hai magar kaise kahūñgā

maḳhdūsh hai ye ghar bhī jo hai terī amānat

tū aa ke mirī jaañ meñ utar kaise kahūñgā

ik misra-e-āvāra to uThtā nahīñ mujh se

aatā hai ġhazal kā bhī hunar kaise kahūñgā

be-barg-o-samar ho to shajar kaise kahunga

phir dasht ko dariya ka safar kaise kahunga

mar jati hai dab kar koi KHwahish mere dil mein

girti hui diwar ko ghar kaise kahunga

sad-parda-e-KHalwat mein chamakti hai meri ruh

dil mein hai mere shams-o-qamar kaise kahunga

be-maya o be-kas hi sahi teri haya hun

ho jae teri mujh pa nazar kaise kahunga

main tere liye hijr ki ek bahti hawa hun

tu aa mujhe aaghosh mein bhar kaise kahunga

ehsas ke baadal mein chhupa hai koi suraj

ye din ka ujala hai magar kaise kahunga

maKHdush hai ye ghar bhi jo hai teri amanat

tu aa ke meri jaan mein utar kaise kahunga

ek misra-e-awara to uThta nahin mujh se

aata hai ghazal ka bhi hunar kaise kahunga