be-bason ya be-sahaaron aur be-chaaron ka sath

be-basoñ yā be-sahāroñ aur be-chāroñ kā saath

kaun detā hai yahāñ ab vaqt ke māroñ kā saath

ye to rukne kā ḳhudārā naam hī lete nahīñ

āñsuoñ ko mil gayā hai kaun se dhāroñ kā saath

maiñ agar chhoḌā gayā to kyoñ use ilzām duuñ

chāñd bhī to chhoḌ de hai TūTte tāroñ kā saath

bhuuk ke har mas.ale ko un se jā ke pūchhiye

bhuuk ne kaaTā ho jin ke saath aThvāroñ kā saath

ab ke ye barsāt mere sar se chhat bhī le ga.ī

mere ghar ko chāhiye thā aur dīvāroñ kā saath

sar paTaktī phir rahī sachchā.ī 'ābid' dar-ba-dar

har taraf se le chukā hai jhuuT aḳhbāroñ kā saath

be-bason ya be-sahaaron aur be-chaaron ka sath

kaun deta hai yahan ab waqt ke maron ka sath

ye to rukne ka KHudara nam hi lete nahin

aansuon ko mil gaya hai kaun se dhaaron ka sath

main agar chhoDa gaya to kyon use ilzam dun

chand bhi to chhoD de hai TuTte taron ka sath

bhuk ke har masale ko un se ja ke puchhiye

bhuk ne kaTa ho jin ke sath aThwaron ka sath

ab ke ye barsat mere sar se chhat bhi le gai

mere ghar ko chahiye tha aur diwaron ka sath

sar paTakti phir rahi sachchai 'abid' dar-ba-dar

har taraf se le chuka hai jhuT aKHbaron ka sath