be-dad-kash hain hum koi bedad-gar nahin

be-dād-kash haiñ ham koī bedād-gar nahīñ

dil kis ko dījiye koī tum sā bashar nahīñ

kahte haiñ vo ki baat tirī mo'atabar nahīñ

ye bhī kināya hai ki fuġhāñ meñ asar nahīñ

lillāh teġh-e-nāz karo ab miyān meñ

bismil hai ik jahāñ koī baaqī bashar nahīñ

tadbīr meñ bhī pā-e-muqaddar hai darmiyāñ

sach hai kisī ke haath meñ naf-o-zarar nahīñ

saudā-e-zulf-e-yār kā qissa na pūchhiye

ye dāstāñ darāz hai kuchh muḳhtasar nahīñ

us but kā kis se shikva-e-bedād kījiye

us samt ko ḳhudā.ī hai koī idhar nahīñ

jab tak bahā-e-bosa na doge na deñge ham

paa.e paḌe hue dil-o-jān-o-jigar nahīñ

maanā abhī na aa.e magar va.ada to kiyā

kyūñkar kahūñ duā-e-sahar meñ asar nahīñ

kyā kah ke soz-e-ishq kā qissa sunā.eñ ham

ātish nahīñ hai barq nahīñ hai sharar nahīñ

sar rakh diyā hai paañv pe qātil ke dekhnā

aatā hai yā vo qaabū meñ yā apnā sar nahīñ

pūchhā na us ne sang-dilī se vagarna kyā

hāl-e-ḳharāb kī mire us ko ḳhabar nahīñ

īmān-o-hubb-e-āl-e-nabī saath hai 'fidā'

be-zād-o-rāhila ye adam kā safar nahīñ

be-dad-kash hain hum koi bedad-gar nahin

dil kis ko dijiye koi tum sa bashar nahin

kahte hain wo ki baat teri mo'atabar nahin

ye bhi kinaya hai ki fughan mein asar nahin

lillah tegh-e-naz karo ab miyan mein

bismil hai ek jahan koi baqi bashar nahin

tadbir mein bhi pa-e-muqaddar hai darmiyan

sach hai kisi ke hath mein naf-o-zarar nahin

sauda-e-zulf-e-yar ka qissa na puchhiye

ye dastan daraaz hai kuchh muKHtasar nahin

us but ka kis se shikwa-e-bedad kijiye

us samt ko KHudai hai koi idhar nahin

jab tak baha-e-bosa na doge na denge hum

pae paDe hue dil-o-jaan-o-jigar nahin

mana abhi na aae magar wada to kiya

kyunkar kahun dua-e-sahar mein asar nahin

kya kah ke soz-e-ishq ka qissa sunaen hum

aatish nahin hai barq nahin hai sharar nahin

sar rakh diya hai panw pe qatil ke dekhna

aata hai ya wo qabu mein ya apna sar nahin

puchha na us ne sang-dili se wagarna kya

haal-e-KHarab ki mere us ko KHabar nahin

iman-o-hubb-e-al-e-nabi sath hai 'fida'

be-zad-o-rahila ye adam ka safar nahin