be-dam hue yun ho ke giraftar-e-mohabbat

be-dam hue yuuñ ho ke giraftār-e-mohabbat

kahtā hai masīhā ki huuñ bīmār-e-mohabbat

rotā hai shab-e-hijr meñ dil ḳhuun ke aañsū

miltā nahīñ koī use ġham-ḳhvār-e-mohabbat

in husn kī galiyoñ meñ ḳharīdār bahut haiñ

lagtā hai shab-o-roz ye bāzār-e-mohabbat

alfāz haiñ ḳhanjar to bujhā zahr meñ lahja

aise meñ bhalā kaise ho iqrār-e-mohabbat

ab ishq hai rusvā to bigaḌtā hai tirā kyā

be-kār meñ kartā hai tū paikār-e-mohabbat

miT jā.eñge ham un ko ḳhabar tak nahīñ hogī

ye soch ke karnā paḌā iz.hār-e-mohabbat

ab dekheñ vahāñ kaun lagā.e na.ī bolī

aate haiñ jahāñ roz ḳharīdār-e-mohabbat

tanhā.ī meñ sochā tujhe jaanā tujhe samjhā

phir khulne lage ham pe bhī asrār-e-mohabbat

'tishna' se kareñ log mohabbat kī jo bāteñ

kaise maiñ batā.ūñ ki huuñ be-zār-e-mohabbat

be-dam hue yun ho ke giraftar-e-mohabbat

kahta hai masiha ki hun bimar-e-mohabbat

rota hai shab-e-hijr mein dil KHun ke aansu

milta nahin koi use gham-KHwar-e-mohabbat

in husn ki galiyon mein KHaridar bahut hain

lagta hai shab-o-roz ye bazar-e-mohabbat

alfaz hain KHanjar to bujha zahr mein lahja

aise mein bhala kaise ho iqrar-e-mohabbat

ab ishq hai ruswa to bigaDta hai tera kya

be-kar mein karta hai tu paikar-e-mohabbat

miT jaenge hum un ko KHabar tak nahin hogi

ye soch ke karna paDa izhaar-e-mohabbat

ab dekhen wahan kaun lagae nai boli

aate hain jahan roz KHaridar-e-mohabbat

tanhai mein socha tujhe jaana tujhe samjha

phir khulne lage hum pe bhi asrar-e-mohabbat

'tishna' se karen log mohabbat ki jo baaten

kaise main bataun ki hun be-zar-e-mohabbat