be-gana-adai hai sitam jaur-o-sitam mein

be-gāna-adā.ī hai sitam jaur-o-sitam meñ

ham chhupne na paa.e ki chhupā aap vo ham meñ

kuchh ilm-o-ḳhirad par nahīñ taqdīr kī miqdār

andaza-e-paimāñ na zyāda meñ na kam meñ

hai tarz-e-mohabbat hī dil-āshob vagarna

kuchh baat adāvat kī na tum meñ hai na ham meñ

har qāfila-e-dard-rasīda kī hai manzil

kyā jāniye ārām hai kyā mulk-e-adam meñ

yārab ho burā is havas-e-dil kā nahīñ chain

iflās bhī khoyā talab-e-jāh-o-hasham meñ

be-his havas-e-vasl meñ aise to hue haiñ

lazzat hai aziyyat meñ halāvat hai na sam meñ

afsāna-e-mai-ḳhāna hai vaa.iz kī zabāñ par

andāza-e-paimāna hai qindīl-e-haram meñ

mujh ko hī nahīñ be-ḳhud-o-behosh kyā kuchh

dīvāne bane aap bhī tashvīsh-e-sitam meñ

us zohd-libāsī ke 'qalaq' tere haiñ qaa.il

kis Dhañg se laayā pisar-e-shaiḳh ko dam meñ

be-gana-adai hai sitam jaur-o-sitam mein

hum chhupne na pae ki chhupa aap wo hum mein

kuchh ilm-o-KHirad par nahin taqdir ki miqdar

andaza-e-paiman na zyaada mein na kam mein

hai tarz-e-mohabbat hi dil-ashob wagarna

kuchh baat adawat ki na tum mein hai na hum mein

har qafila-e-dard-rasida ki hai manzil

kya jaaniye aaram hai kya mulk-e-adam mein

yarab ho bura is hawas-e-dil ka nahin chain

iflas bhi khoya talab-e-jah-o-hasham mein

be-his hawas-e-wasl mein aise to hue hain

lazzat hai aziyyat mein halawat hai na sam mein

afsana-e-mai-KHana hai waiz ki zaban par

andaza-e-paimana hai qindil-e-haram mein

mujh ko hi nahin be-KHud-o-behosh kya kuchh

diwane bane aap bhi tashwish-e-sitam mein

us zohd-libasi ke 'qalaq' tere hain qail

kis Dhang se laya pisar-e-shaiKH ko dam mein