be-hisi ki dhul mein behis aTe rah jaenge

be-hisī kī dhuul meñ behis aTe rah jā.eñge

log apne apne firqoñ meñ baTe rah jā.eñge

Dhāñp legī jabr kī dhartī parindoñ ke badan

aur bāl-o-par fazāoñ meñ kaTe rah jā.eñge

log utar ā.eñge ġhurbat se mahāz-ārā.ī par

shahr meñ har samt zālim marhaTe rah jā.eñge

jangaloñ kī samt bah jā.egā jismoñ kā hujūm

shahr kī vīrāniyoñ meñ sar kaTe rah jā.eñge

ḳhvāhisheñ uḌ jā.eñgī taaza havā ke saath saath

bistaraoñ par silvaToñ ke jamghaTe rah jā.eñge

āñdhiyāñ malba banā ke chhoḌ jā.eñgī unheñ

hausle apne makānoñ ke DaTe rah jā.eñge

guftugū zehnoñ meñ kuchh tahlīl sī ho jā.egī

ḳhud-baḳhud mafhūm hoñToñ par raTe rah jā.eñge

manzileñ 'aḳhtar' palaT kar dekhtī rah jā.eñgī

ham talab kī raah meñ pīchhe haTe rah jā.eñge

be-hisi ki dhul mein behis aTe rah jaenge

log apne apne firqon mein baTe rah jaenge

Dhanp legi jabr ki dharti parindon ke badan

aur baal-o-par fazaon mein kaTe rah jaenge

log utar aaenge ghurbat se mahaz-arai par

shahr mein har samt zalim marhaTe rah jaenge

jangalon ki samt bah jaega jismon ka hujum

shahr ki viraniyon mein sar kaTe rah jaenge

KHwahishen uD jaengi taza hawa ke sath sath

bistaraon par silwaTon ke jamghaTe rah jaenge

aandhiyan malba bana ke chhoD jaengi unhen

hausle apne makanon ke DaTe rah jaenge

guftugu zehnon mein kuchh tahlil si ho jaegi

KHud-baKHud mafhum honTon par raTe rah jaenge

manzilen 'aKHtar' palaT kar dekhti rah jaengi

hum talab ki rah mein pichhe haTe rah jaenge