be-hisi paida hui mere uThe hathon ke bich

be-hisī paidā huī mere uThe hāthoñ ke biich

fāsla maiñ ab rakhūñ apnī munājātoñ ke biich

kachchī ābādī hamārī āfatoñ meñ ghir ga.ī

lambā vaqfa chāhiye thā ab ke barsātoñ ke biich

merī qismat meñ añdhere ab tamanna dil meñ hai

din nikal aa.e kabhī ab dard kī rātoñ ke biich

mujh ko lagtā hai bichhaḌne kā samay nazdīk hai

talḳhiyāñ ab aa ga.iiñ haiñ pyaar kī bātoñ ke biich

saarī ḳhushiyāñ us ko de kar dard mujh ko de diye

munsifoñ ne faisla ye likh diyā khātoñ ke biich

maiñ to samjhā thā vafāoñ kā sila mujh ko diyā

zahr us ne de diyā ab mujh ko sauġhātoñ ke biich

us se jo kahne ga.e the baat dil meñ rah ga.ī

chand lamhe de na paayā vo mulāqātoñ ke biich

be-hisi paida hui mere uThe hathon ke bich

fasla main ab rakhun apni munajaton ke bich

kachchi aabaadi hamari aafaton mein ghir gai

lamba waqfa chahiye tha ab ke barsaton ke bich

meri qismat mein andhere ab tamanna dil mein hai

din nikal aae kabhi ab dard ki raaton ke bich

mujh ko lagta hai bichhaDne ka samay nazdik hai

talKHiyan ab aa gain hain pyar ki baaton ke bich

sari KHushiyan us ko de kar dard mujh ko de diye

munsifon ne faisla ye likh diya khaton ke bich

main to samjha tha wafaon ka sila mujh ko diya

zahr us ne de diya ab mujh ko saughaton ke bich

us se jo kahne gae the baat dil mein rah gai

chand lamhe de na paya wo mulaqaton ke bich