be-intiha hona hai to is KHak ke ho jao

be-intihā honā hai to is ḳhaak ke ho jaao

imkāñ kī masāfat karo aflāk ke ho jaao

sab qissoñ ko chhoḌo dil-e-sad-chāk ke ho jaao

is daur-e-junūñ-ḳhez meñ idrāk ke ho jaao

ḳhushiyoñ se kahāñ rabt hai ham ko bhī tumheñ bhī

aa jaao isī lamha-e-namnāk ke ho jaao

is baaġh meñ shamshīr-e-havā se na bachoge

ḳhush rañg ho jaao kisī poshāk ke ho jaao

be-zā.eqa hone se yahī zā.iqa achchhā

ashjār se utro ḳhas-o-ḳhāshāk ke ho jaao

sar-poshī kā fan hāthoñ ko sikhlāo vagarna

be-āñkh ke be-kān ke be-nāk ke ho jaao

'shahpar' kī tarah ḳhaak se uḌte hī phiroge

banñā hai to bas jaao kisī chaak ke ho jaao

be-intiha hona hai to is KHak ke ho jao

imkan ki masafat karo aflak ke ho jao

sab qisson ko chhoDo dil-e-sad-chaak ke ho jao

is daur-e-junun-KHez mein idrak ke ho jao

KHushiyon se kahan rabt hai hum ko bhi tumhein bhi

aa jao isi lamha-e-namnak ke ho jao

is bagh mein shamshir-e-hawa se na bachoge

KHush rang ho jao kisi poshak ke ho jao

be-zaeqa hone se yahi zaiqa achchha

ashjar se utro KHas-o-KHashak ke ho jao

sar-poshi ka fan hathon ko sikhlao wagarna

be-ankh ke be-kan ke be-nak ke ho jao

'shahpar' ki tarah KHak se uDte hi phiroge

banna hai to bas jao kisi chaak ke ho jao