be-KHabar-e-hayat tha gham ne mujhe jaga diya

be-ḳhabar-e-hayāt thā ġham ne mujhe jagā diyā

ziist kā raaz khol kar maut kā aasrā diyā

zulf-e-siyah kī yaad meñ ḳhauf-e-pas-e-fanā kahāñ

tūl-e-shab-e-firāq ne sub.h kā ġham miTā diyā

maut kahīñ nahīñ hameñ aur kahāñ nahīñ hai maut

kis ne banā ke saḳht-jāñ siine meñ dil banā diyā

talḳh to thā ġham-e-hayāt itnā na talḳh thā magar

pūchh ke tum ne hāl-e-dil zahr mujhe pilā diyā

aa ke palaT gayā koī aur na hameñ ḳhabar huī

kaif-e-umīd-e-dīd ne shaam hī se sulā diyā

ġham-kada-e-hayāt meñ aah maiñ vo charāġh huuñ

sub.h huī jalā diyā shaam huī bujhā diyā

haa.e vo dard kyā huā jis se thī zindagī mirī

ḳhud hī miTā nahīñ hai dil dil ne mujhe miTā diyā

haif ki be-kasī kī sharm aaj 'jigar' na rah sakī

ujḌe hue mazār par kis ne diyā jalā diyā

be-KHabar-e-hayat tha gham ne mujhe jaga diya

zist ka raaz khol kar maut ka aasra diya

zulf-e-siyah ki yaad mein KHauf-e-pas-e-fana kahan

tul-e-shab-e-firaq ne subh ka gham miTa diya

maut kahin nahin hamein aur kahan nahin hai maut

kis ne bana ke saKHt-jaan sine mein dil bana diya

talKH to tha gham-e-hayat itna na talKH tha magar

puchh ke tum ne haal-e-dil zahr mujhe pila diya

aa ke palaT gaya koi aur na hamein KHabar hui

kaif-e-umid-e-did ne sham hi se sula diya

gham-kada-e-hayat mein aah main wo charagh hun

subh hui jala diya sham hui bujha diya

hae wo dard kya hua jis se thi zindagi meri

KHud hi miTa nahin hai dil dil ne mujhe miTa diya

haif ki be-kasi ki sharm aaj 'jigar' na rah saki

ujDe hue mazar par kis ne diya jala diya