be-KHayali mein na jaane kya se kya likhti rahi

be-ḳhayālī meñ na jaane kyā se kyā likhtī rahī

ek patthar ko mohabbat kā ḳhudā likhtī rahī

bārhā mazlūm ġhunchoñ ko taḌaptā dekh kar

zard pattoñ par lahū se karbalā likhtī rahī

kārvāñ luTne pe ab ḳhud se bahut bezār huuñ

jaane kyoñ maiñ rahzanoñ ko rahnumā likhtī rahī

vo sar-e-bāzār saudā-e-vafā kartā rahā

naam jis kā maiñ hamesha bā-vafā likhtī rahī

bebasī kī shaam ko jab muḳhtasar likhnā paḌā

dard ke sahrā meñ shām-e-karbalā likhtī rahī

sang se bhī saḳht niklā āḳhirash vo dil bahut

umr bhar jis ko 'shabīna' aa.ina likhtī rahī

be-KHayali mein na jaane kya se kya likhti rahi

ek patthar ko mohabbat ka KHuda likhti rahi

barha mazlum ghunchon ko taDapta dekh kar

zard patton par lahu se karbala likhti rahi

karwan luTne pe ab KHud se bahut bezar hun

jaane kyon main rahzanon ko rahnuma likhti rahi

wo sar-e-bazar sauda-e-wafa karta raha

nam jis ka main hamesha ba-wafa likhti rahi

bebasi ki sham ko jab muKHtasar likhna paDa

dard ke sahra mein sham-e-karbala likhti rahi

sang se bhi saKHt nikla aaKHirash wo dil bahut

umr bhar jis ko 'shabina' aaina likhti rahi