be-KHudi mein pahlu-e-iqrar pahle to na tha

be-ḳhudī meñ pahlū-e-iqrār pahle to na thā

itnā ġhāfil vo but-e-ayyār pahle to na thā

ahl-e-dil jaate haiñ ab dār-o-rasan kī raah se

is qadar mushkil visāl-e-yār pahle to na thā

misr kī galiyāñ utar aa.ī haiñ apne shahr meñ

husn vāloñ kā ye hāl-e-zār pahle to na thā

aa rahī hai ḳhud-baḳhud shāyad koī manzil qarīb

mehrbāñ yuuñ qāfila-sālār pahle to na thā

us meñ bhī kuchh raaz hai varna dayār-e-husn meñ

dard-mandoñ kā koī ġham-ḳhvār pahle to na thā

hosh meñ aane lage haiñ un bahāroñ ke tufail

varna dīvānoñ kā ye kirdār pahle to na thā

roz-o-shab apne liye haiñ qatl ke fatve 'qatīl'

muftī-e-shahr is qadar dīñ-dār pahle to na thā

be-KHudi mein pahlu-e-iqrar pahle to na tha

itna ghafil wo but-e-ayyar pahle to na tha

ahl-e-dil jate hain ab dar-o-rasan ki rah se

is qadar mushkil visal-e-yar pahle to na tha

misr ki galiyan utar aai hain apne shahr mein

husn walon ka ye haal-e-zar pahle to na tha

aa rahi hai KHud-baKHud shayad koi manzil qarib

mehrban yun qafila-salar pahle to na tha

us mein bhi kuchh raaz hai warna dayar-e-husn mein

dard-mandon ka koi gham-KHwar pahle to na tha

hosh mein aane lage hain un bahaaron ke tufail

warna diwanon ka ye kirdar pahle to na tha

roz-o-shab apne liye hain qatl ke fatwe 'qatil'

mufti-e-shahr is qadar din-dar pahle to na tha