be-nawai ne meri had se guzar jaane diya

be-navā.ī ne mirī had se guzar jaane diyā

vo jo mujh se chāhtā thā maiñ ne kar jaane diyā

phir kuredā aur jī-bhar kar namak-pāshī bhī kī

pahle us ne mere dil ke zaḳhm bhar jaane diyā

rok kar rasta batā dete ki ḳhud ko jaan le

tum ne kaise us ko ḳhud se be-ḳhabar jaane diyā

ab ḳhatā-kārī se koī rokne vaalā nahīñ

ruuh kī zinda sadā ko maiñ ne mar jaane diyā

jaan kī baazī lagā kar bhī bachā laate use

tum ne gahre pāniyoñ meñ kyuuñ utar jaane diyā

kaisī ārā.ish huī be-shāna-o-be-ā.ina

gesuoñ ko us ne bikhrā kar sañvar jaane diyā

faisla Taltā rahā shunavā.ī kī tāḳhīr se

ḳhud adālat ne gavāhoñ ko mukar jaane diyā

vo to aayā thā jalā kar apnī saarī kashtiyāñ

tum ne kis dil se use bā-chashm-e-tar jaane diyā

be-nawai ne meri had se guzar jaane diya

wo jo mujh se chahta tha main ne kar jaane diya

phir kureda aur ji-bhar kar namak-pashi bhi ki

pahle us ne mere dil ke zaKHm bhar jaane diya

rok kar rasta bata dete ki KHud ko jaan le

tum ne kaise us ko KHud se be-KHabar jaane diya

ab KHata-kari se koi rokne wala nahin

ruh ki zinda sada ko main ne mar jaane diya

jaan ki bazi laga kar bhi bacha late use

tum ne gahre paniyon mein kyun utar jaane diya

kaisi aaraish hui be-shana-o-be-aina

gesuon ko us ne bikhra kar sanwar jaane diya

faisla Talta raha shunawai ki taKHir se

KHud adalat ne gawahon ko mukar jaane diya

wo to aaya tha jala kar apni sari kashtiyan

tum ne kis dil se use ba-chashm-e-tar jaane diya