be-qadron ki baat na chheDo dukh hota hai

be-qadroñ kī baat na chheḌo dukh hotā hai

yuuñ na hamāre zaḳhm kuredo dukh hotā hai

tum ne ta.alluq toḌā thā apnī marzī se

mere sar ilzām na Daalo dukh hotā hai

mujh ko bahlāne kī koshish bhī mat karnā

jhūTī hamdardī rahne do dukh hotā hai

bin tere din jaise-taise kaaT liyā par

kaise guzrī raat na pūchho dukh hotā hai

phūloñ aur kaliyoñ kī bāteñ-vāteñ chhoḌo

dukhtī rag par haath na rakkho dukh hotā hai

shā.er huuñ tanhā.ī mujh ko raas aatī hai

logo mere paas na baiTho dukh hotā hai

tere baa'd mire dil par kyā kyā guzrī hai

jaane do 'sāgar' jī chhoḌo dukh hotā hai

be-qadron ki baat na chheDo dukh hota hai

yun na hamare zaKHm kuredo dukh hota hai

tum ne talluq toDa tha apni marzi se

mere sar ilzam na Dalo dukh hota hai

mujh ko bahlane ki koshish bhi mat karna

jhuTi hamdardi rahne do dukh hota hai

bin tere din jaise-taise kaT liya par

kaise guzri raat na puchho dukh hota hai

phulon aur kaliyon ki baaten-waten chhoDo

dukhti rag par hath na rakkho dukh hota hai

shaer hun tanhai mujh ko ras aati hai

logo mere pas na baiTho dukh hota hai

tere ba'd mere dil par kya kya guzri hai

jaane do 'sagar' ji chhoDo dukh hota hai