be-qarari hai ki aasar ye jhanjhaT ke hain

be-qarārī hai ki āsār ye jhanjhaT ke haiñ

vasvase in dinoñ dil meñ na.ī aahaT ke haiñ

vo na aa.e to utarte nahīñ paanī meñ bataḳh

us ke naqqāl bhī dil bāḳhtā panghaT ke haiñ

chheḌte haiñ mujhe mahrūm-e-tamannā kah kar

ek do in meñ yaqīnan usī naTkhaT ke haiñ

hai ye duniyā baḌī harrāfa magar dil vaale

ḳhūgar-e-ġham haiñ azal se tirī chaukhaT ke haiñ

ham muqallid haiñ tire hai hameñ marġhūb jamāl

aur vo log samajhte haiñ ki ham bhaTke haiñ

koī parḳhāsh pe uksātā nahīñ hazrat ko

ya.anī badnām ziyāda hī mire jhaTke haiñ

itnā phūleñ na ka.ī ghaaT kā paanī pī kar

TuuT jā.eñge ki miTTī hī ke sab maTke haiñ

hazm hoñge na ye ash.ār to siflī nāqid

qai kareñge ki vo kārinde milāvaT ke haiñ

apne ham-asroñ meñ mumtāz nahīñ haiñ lekin

'sarfarāz-āzmī’ logoñ se zarā haT ke haiñ

be-qarari hai ki aasar ye jhanjhaT ke hain

waswase in dinon dil mein nai aahaT ke hain

wo na aae to utarte nahin pani mein bataKH

us ke naqqal bhi dil baKHta panghaT ke hain

chheDte hain mujhe mahrum-e-tamanna kah kar

ek do in mein yaqinan usi naTkhaT ke hain

hai ye duniya baDi harrafa magar dil wale

KHugar-e-gham hain azal se teri chaukhaT ke hain

hum muqallid hain tere hai hamein marghub jamal

aur wo log samajhte hain ki hum bhaTke hain

koi parKHash pe uksata nahin hazrat ko

yani badnam ziyaada hi mere jhaTke hain

itna phulen na kai ghaT ka pani pi kar

TuT jaenge ki miTTi hi ke sab maTke hain

hazm honge na ye ashaar to sifli naqid

qai karenge ki wo karinde milawaT ke hain

apne ham-asron mein mumtaz nahin hain lekin

'sarfaraaz-azmi’ logon se zara haT ke hain