be-rabt mausamon mein samoe gae the log

be-rabt mausamoñ meñ samo.e ga.e the log

kyā kahiye kis laḌī meñ piro.e ga.e the log

be-nām rāstoñ ke safar kā savāl thā

nafrat kī naddiyoñ meñ Dubo.e ga.e the log

bīnā.iyāñ simaT ke palaTtī thiiñ apnī samt

apnī anā ke dasht meñ kho.e ga.e the log

yuuñ to safar meñ chāñd sitāre the ham-rikāb

phir bhī ‘azāb-e-shab meñ piro.e ga.e the log

Thahrā huā vo lamha abhī tak ḳhalā meñ hai

jab tīrgī ke ġhaar meñ Dho.e ga.e the log

nākām ho ke dhuup zamīñ se palaT ga.ī

'ansar' na jaane kaise bhigo.e ga.e the log

be-rabt mausamon mein samoe gae the log

kya kahiye kis laDi mein piroe gae the log

be-nam raston ke safar ka sawal tha

nafrat ki naddiyon mein Duboe gae the log

binaiyan simaT ke palaTti thin apni samt

apni ana ke dasht mein khoe gae the log

yun to safar mein chand sitare the ham-rikab

phir bhi ‘azab-e-shab mein piroe gae the log

Thahra hua wo lamha abhi tak KHala mein hai

jab tirgi ke ghaar mein Dhoe gae the log

nakaam ho ke dhup zamin se palaT gai

'ansar' na jaane kaise bhigoe gae the log