be-rang be-nishan balaon ki zad mein hain

be-rang be-nishān balāoñ kī zad meñ haiñ

mere sabhī charāġh havāoñ kī zad meñ haiñ

bhīgī huī havā.eñ badan chūmne lagīñ

ab qāfile hamāre ghaTāoñ kī zad meñ haiñ

kaT kaT ke gir rahī haiñ laveñ jū-e-ḳhauf meñ

raushan charāġh tiira fazāoñ kī zad meñ haiñ

harf-e-ġhalat kī tarah miTe jaate haiñ nuqūsh

rāheñ tamām rāhnumāoñ kī zad meñ haiñ

bīnā.ī jā rahī hai mah-o-āftāb kī

ā.īne shash jihat ke ḳhalāoñ kī zad meñ haiñ

kashkol be-talab kī kashish kaam aa ga.ī

saare buland-o-past duāoñ kī zad meñ haiñ

hairat sulag rahī hai har ik shāḳh-e-dīd par

jangal tamām sho.ala-navāoñ kī zad meñ haiñ

'yāvar' mirī ye āñkheñ kisī ke jamāl kī

be-dāġh ujlī ujlī ridāoñ kī zad meñ haiñ

be-rang be-nishan balaon ki zad mein hain

mere sabhi charagh hawaon ki zad mein hain

bhigi hui hawaen badan chumne lagin

ab qafile hamare ghaTaon ki zad mein hain

kaT kaT ke gir rahi hain lawen ju-e-KHauf mein

raushan charagh tera fazaon ki zad mein hain

harf-e-ghalat ki tarah miTe jate hain nuqush

rahen tamam rahnumaon ki zad mein hain

binai ja rahi hai mah-o-aftab ki

aaine shash jihat ke KHalaon ki zad mein hain

kashkol be-talab ki kashish kaam aa gai

sare buland-o-past duaon ki zad mein hain

hairat sulag rahi hai har ek shaKH-e-did par

jangal tamam shoala-nawaon ki zad mein hain

'yawar' meri ye aankhen kisi ke jamal ki

be-dagh ujli ujli ridaon ki zad mein hain