be-ruKHi ne uski mujhko kar diya mahfil se dur

be-ruḳhī ne us kī mujh ko kar diyā mahfil se duur

vo hamāre dil meñ hai aur ham haiñ us ke dil se duur

umDe tūfānoñ meñ bhī hai kashtī-e-ulfat ravāñ

ham kabhī nazdīk hote haiñ kabhī sāhil se duur

ishq kī vaadī ko tai karnā koī āsāñ nahīñ

gāmzan paiham rahe phir bhī rahe manzil se duur

TukḌe TukḌe kar ke rakh dete haiñ ḳhanjar kī tarah

dil jigar ai logo rakhnā abrū-e-qātil se duur

bahr-e-ulfat kā kinārā ahl-e-dil nāpaid hai

jis ko sāhil samjhe ho vo mauj hai sāhil se duur

nit-na.ī dushvāriyāñ rāh-e-vafā meñ sah ke ham

chalte chalte thak ga.e jab phir na the manzil se duur

kahtā hai be-'aql nāseh ishq ko dīvāngī

ishq ke dīvāno rahnā naam ke 'āqil se duur

raqs-e-bismil kā tamāshā to kiyā hotā huzūr

kar ke bismil ho ga.e kis vāste bismil se duur

vo mohabbat karne vaale dil jo milte haiñ kabhī

laakh duniyā chāhe hote haiñ baḌī mushkil se duur

gar masīhā hote karte zaḳhm-e-dil kā kuchh ‘ilāj

aur zaḳhmī kar ke vo to ho ga.e ghā.il se duur

āstān-e-yār par pahuñchā talab jis dil meñ thī

dāman-e-mahbūb rahtā hai sadā ġhāfil se duur

dil 'fazā' kā bujh gayā andher duniyā ho ga.ī

ho gayā jis roz se vo us mah-e-kāmil se duur

be-ruKHi ne us ki mujh ko kar diya mahfil se dur

wo hamare dil mein hai aur hum hain us ke dil se dur

umDe tufanon mein bhi hai kashti-e-ulfat rawan

hum kabhi nazdik hote hain kabhi sahil se dur

ishq ki wadi ko tai karna koi aasan nahin

gamzan paiham rahe phir bhi rahe manzil se dur

TukDe TukDe kar ke rakh dete hain KHanjar ki tarah

dil jigar ai logo rakhna abru-e-qatil se dur

bahr-e-ulfat ka kinara ahl-e-dil napaid hai

jis ko sahil samjhe ho wo mauj hai sahil se dur

nit-nai dushwariyan rah-e-wafa mein sah ke hum

chalte chalte thak gae jab phir na the manzil se dur

kahta hai be-'aql naseh ishq ko diwangi

ishq ke diwano rahna nam ke 'aqil se dur

raqs-e-bismil ka tamasha to kiya hota huzur

kar ke bismil ho gae kis waste bismil se dur

wo mohabbat karne wale dil jo milte hain kabhi

lakh duniya chahe hote hain baDi mushkil se dur

gar masiha hote karte zaKHm-e-dil ka kuchh ‘ilaj

aur zaKHmi kar ke wo to ho gae ghail se dur

aastan-e-yar par pahuncha talab jis dil mein thi

daman-e-mahbub rahta hai sada ghafil se dur

dil 'faza' ka bujh gaya andher duniya ho gai

ho gaya jis roz se wo us mah-e-kaamil se dur