be-ruKHi o bewafa achchhi nahin

be-ruḳhī o bevafā achchhī nahīñ

dil-jaloñ kī badduā achchhī nahīñ

ġhair bhī to ishq kā bhartā hai dam

sirf ham par hī jafā achchhī nahīñ

dekh kar ġhamgīñ mujhe kahte haiñ vo

kyoñ tabī.at aaj kyā achchhī nahīñ

pahle hī dil un ke haiñ TuuTe hue

jāñ-nisāroñ se daġhā achchhī nahīñ

bosa lene par ḳhafā ho kar kahā

dekhiye aisī ḳhatā achchhī nahīñ

le ke dil karte ho vāpas kis liye

kyā sabab hai jins kyā achchhī nahīñ

phir vahī zikr-e-adū har baat meñ

aap kī bas ye adā achchhī nahīñ

kis liye karte ho parda vasl meñ

aise mauqoñ par hayā achchhī nahīñ

dil na maane to batāo kyā kareñ

ham ne maanā iltijā achchhī nahīñ

bhāñp jā.egā zamāna dekhiye

is qadar ham se hayā achchhī nahīñ

kyā zarūrat vo ḳharīdeñ kis liye

kahte haiñ jins-e-vafā achchhī nahīñ

rūThnā albatta kuchh dilchasp hai

yuuñ to koī bhī jafā achchhī nahīñ

raat din 'hājir' butoñ kā zikr ho

koī baat is ke sivā achchhī nahīñ

be-ruKHi o bewafa achchhi nahin

dil-jalon ki baddua achchhi nahin

ghair bhi to ishq ka bharta hai dam

sirf hum par hi jafa achchhi nahin

dekh kar ghamgin mujhe kahte hain wo

kyon tabiat aaj kya achchhi nahin

pahle hi dil un ke hain TuTe hue

jaan-nisaron se dagha achchhi nahin

bosa lene par KHafa ho kar kaha

dekhiye aisi KHata achchhi nahin

le ke dil karte ho wapas kis liye

kya sabab hai jins kya achchhi nahin

phir wahi zikr-e-adu har baat mein

aap ki bas ye ada achchhi nahin

kis liye karte ho parda wasl mein

aise mauqon par haya achchhi nahin

dil na mane to batao kya karen

hum ne mana iltija achchhi nahin

bhanp jaega zamana dekhiye

is qadar hum se haya achchhi nahin

kya zarurat wo KHariden kis liye

kahte hain jins-e-wafa achchhi nahin

ruThna albatta kuchh dilchasp hai

yun to koi bhi jafa achchhi nahin

raat din 'hajir' buton ka zikr ho

koi baat is ke siwa achchhi nahin