be-sabab ji se guzarna nahin achchha hota

be-sabab jī se guzarnā nahīñ achchhā hotā

maut se pahle bhī marnā nahīñ achchhā hotā

baat ho koī to insān bigaḌ bhī jaa.e

vahm-e-bejā pe bipharnā nahīñ achchhā hotā

sabr se baiTh agar tāqat-e-parvāz nahīñ

shikva-e-be-parī karnā nahīñ achchhā hotā

marnā un kā hai jo auroñ ke liye marte haiñ

apne hī vāste marnā nahīñ achchhā hotā

aap sachche haiñ to kuchh pās-e-zabāñ bhī rakhiye

karke va.ada to mukarnā nahīñ achchhā hotā

aadmī apnī hadoñ hī meñ rahe behtar hai

sar se paanī kā guzarnā nahīñ achchhā hotā

fikr-e-uqbā bhī to lāzim hai kabhī ai nādāñ

fikr-e-hastī hī meñ marnā nahīñ achchhā hotā

maut ko khel samajhnā bhī hai ik nādānī

ziist se pyaar bhī karnā nahīñ achchhā hotā

baat to jab hai ki āsūda-e-manzil hoñ bhī

yaar tanhā to utarnā nahīñ achchhā hotā

had koī 'sehr' huā kartī hai zabt-e-ġham kī

yūñhī ghuT-ghuT ke to marnā nahīñ achchhā hotā

be-sabab ji se guzarna nahin achchha hota

maut se pahle bhi marna nahin achchha hota

baat ho koi to insan bigaD bhi jae

wahm-e-beja pe bipharna nahin achchha hota

sabr se baiTh agar taqat-e-parwaz nahin

shikwa-e-be-pari karna nahin achchha hota

marna un ka hai jo auron ke liye marte hain

apne hi waste marna nahin achchha hota

aap sachche hain to kuchh pas-e-zaban bhi rakhiye

karke wada to mukarna nahin achchha hota

aadmi apni hadon hi mein rahe behtar hai

sar se pani ka guzarna nahin achchha hota

fikr-e-uqba bhi to lazim hai kabhi ai nadan

fikr-e-hasti hi mein marna nahin achchha hota

maut ko khel samajhna bhi hai ek nadani

zist se pyar bhi karna nahin achchha hota

baat to jab hai ki aasuda-e-manzil hon bhi

yar tanha to utarna nahin achchha hota

had koi 'sehr' hua karti hai zabt-e-gham ki

yunhi ghuT-ghuT ke to marna nahin achchha hota