be-sabab KHauf se dil mera larazta kyun hai

be-sabab ḳhauf se dil merā laraztā kyuuñ hai

bāt-be-bāt yūñhī ḳhud se ulajhtā kyuuñ hai

shor aise na kare bazm meñ ḳhāmosh rahe

ik tavātur se ḳhudā jaane dhaḌaktā kyuuñ hai

mom kā ho ke bhī patthar kā banā rahtā thā

ab ye jazbāt kī hiddat se pighaltā kyuuñ hai

hijr ke jitne bhī mausam the vo kaaTe hañs kar

phir sar-e-shām hī yādoñ meñ sisaktā kyuuñ hai

us ke hone se maiñ inkār karūñ to kaise

aks us kā mirī āñkhoñ meñ jhalaktā kyuuñ hai

jab bhī ḳhāmoshī se tanhā.ī meñ baiThī jā kar

karb sā us kī rifāqat kā chhalaktā kyuuñ hai

phuuT jaa.e ye kisī taur koī Thes lage

ban ke phoḌā sā vo ab dil meñ Tapaktā kyuuñ hai

jo muqaddar meñ likhā thā vo huā hai 'asrā'

ḳhvāb kī bātoñ se is tarah machaltā kyuuñ hai

be-sabab KHauf se dil mera larazta kyun hai

baat-be-baat yunhi KHud se ulajhta kyun hai

shor aise na kare bazm mein KHamosh rahe

ek tawatur se KHuda jaane dhaDakta kyun hai

mom ka ho ke bhi patthar ka bana rahta tha

ab ye jazbaat ki hiddat se pighalta kyun hai

hijr ke jitne bhi mausam the wo kaTe hans kar

phir sar-e-sham hi yaadon mein sisakta kyun hai

us ke hone se main inkar karun to kaise

aks us ka meri aankhon mein jhalakta kyun hai

jab bhi KHamoshi se tanhai mein baiThi ja kar

karb sa us ki rifaqat ka chhalakta kyun hai

phuT jae ye kisi taur koi Thes lage

ban ke phoDa sa wo ab dil mein Tapakta kyun hai

jo muqaddar mein likha tha wo hua hai 'asra'

KHwab ki baaton se is tarah machalta kyun hai