be-sabab Thik nahin ghar se nikal kar jaana

be-sabab Thiik nahīñ ghar se nikal kar jaanā

justujū ho koī dil meñ to safar par jaanā

din ke tapte hue mausam meñ bhaTaknā har-sū

shaam aa.e to parindoñ kī tarah ghar jaanā

har guzarte hue be-rañg se mausam ke liye

ik na.ī rut ke na.e phuul yahāñ dhar jaanā

log jaltā huā ghar dekh ke ḳhush hote haiñ

aur ham ne use ab apnā muqaddar jaanā

zehn maflūj to afkār haiñ āseb-zada

ye bhī kyā vaqt hai har baat pe Dar Dar jaanā

sā.ebāñ āb-e-ravāñ phuul bahāreñ ḳhushbū

in sarāboñ se har ik gaam hai bach kar jaanā

us kī palkoñ pe chamak uTThe haiñ jab bhī aañsū

qatre qatre ko mire dil ne samundar jaanā

be-sabab Thik nahin ghar se nikal kar jaana

justuju ho koi dil mein to safar par jaana

din ke tapte hue mausam mein bhaTakna har-su

sham aae to parindon ki tarah ghar jaana

har guzarte hue be-rang se mausam ke liye

ek nai rut ke nae phul yahan dhar jaana

log jalta hua ghar dekh ke KHush hote hain

aur hum ne use ab apna muqaddar jaana

zehn mafluj to afkar hain aaseb-zada

ye bhi kya waqt hai har baat pe Dar Dar jaana

saeban aab-e-rawan phul bahaaren KHushbu

in sarabon se har ek gam hai bach kar jaana

us ki palkon pe chamak uTThe hain jab bhi aansu

qatre qatre ko mere dil ne samundar jaana