be-sabab wahshaten karne ka sabab jaanta hai

be-sabab vahshateñ karne kā sabab jāntā hai

maiñ jo kartā huuñ vo kyuuñ kartā huuñ sab jāntā hai

bolte sab haiñ magar baat kahāñ karte haiñ

ye salīqa to koī mohr-ba-lab jāntā hai

mujh se gustāḳh ko vo kaise gavāra kar le

jab ki vo shahr-e-suḳhan hadd-e-adab jāntā hai

apne hī Dhab se vo kartā hai mirī chāragarī

kab chamaknā hai mirā tāle-e-shab jāntā hai

kaise mausam meñ kahāñ rāhat-e-jāñ utregā

aisī sab bāteñ dil-e-ranj-e-talab jāntā hai

bhuul saktā hai use ye dil-e-ayyār magar

chashm-o-abrū kā fusūñ lazzat-e-lab jāntā hai

muskurā kar jise miltā huuñ hamesha 'azmī'

ik vahī merī udāsī kā sabab jāntā hai

be-sabab wahshaten karne ka sabab jaanta hai

main jo karta hun wo kyun karta hun sab jaanta hai

bolte sab hain magar baat kahan karte hain

ye saliqa to koi mohr-ba-lab jaanta hai

mujh se gustaKH ko wo kaise gawara kar le

jab ki wo shahr-e-suKHan hadd-e-adab jaanta hai

apne hi Dhab se wo karta hai meri chaaragari

kab chamakna hai mera tale-e-shab jaanta hai

kaise mausam mein kahan rahat-e-jaan utrega

aisi sab baaten dil-e-ranj-e-talab jaanta hai

bhul sakta hai use ye dil-e-ayyar magar

chashm-o-abru ka fusun lazzat-e-lab jaanta hai

muskura kar jise milta hun hamesha 'azmi'

ek wahi meri udasi ka sabab jaanta hai