be-sud hai ye josh-e-girya ai shama sahar ho jaane tak

be-sūd hai ye josh-e-girya ai sham.a sahar ho jaane tak

chhīñTā tire ashk-e-paiham kā pahuñchā na kabhī parvāne tak

ai ahl-e-nazar merī hastī sab kuchh thī kabhī ab kuchh bhī nahīñ

zinda huuñ magar mehmān-e-baqā ik saañs ke aane jaane tak

haañ ġhaur se ik ḳhuddār nazar apne hī garebāñ par nāseh

kyā jaane rahegā kis had meñ dīvāna tire samjhāne tak

ai ḳhāk-e-pareshāñ ke zarro āġhosh meñ tum mujh ko le lo

tamkīn-o-ḳhudī ko Thukrātā pahuñchā huuñ maiñ vīrāne tak

āshufta nizām-e-hastī hai kuchh aur na barham ho jaa.e

mashshsāta-e-fitrat ke hāthoñ gesū-e-butāñ suljhāne tak

va.ada hai magar kis aalam meñ ik shoḳh-e-taġhāful fitrat kā

jab laila-e-shab ke bal khāte gesū utar aa.eñ shāne tak

be-sud hai ye josh-e-girya ai shama sahar ho jaane tak

chhinTa tere ashk-e-paiham ka pahuncha na kabhi parwane tak

ai ahl-e-nazar meri hasti sab kuchh thi kabhi ab kuchh bhi nahin

zinda hun magar mehman-e-baqa ek sans ke aane jaane tak

han ghaur se ek KHuddar nazar apne hi gareban par naseh

kya jaane rahega kis had mein diwana tere samjhane tak

ai KHak-e-pareshan ke zarro aaghosh mein tum mujh ko le lo

tamkin-o-KHudi ko Thukraata pahuncha hun main virane tak

aashufta nizam-e-hasti hai kuchh aur na barham ho jae

mashshsata-e-fitrat ke hathon gesu-e-butan suljhane tak

wada hai magar kis aalam mein ek shoKH-e-taghaful fitrat ka

jab laila-e-shab ke bal khate gesu utar aaen shane tak