be-tahi yahi hogi ye jahan kahin honge

be-tahī yahī hogī ye jahāñ kahīñ hoñge

sat.h kāTne vaale sat.h-āfrīñ hoñge

āftāb haT jaa.e jhilmilāne vaale hī

āsmān-e-vīrāñ meñ raunaq āfrīñ hoñge

zindagī manāne ko vahm bhī ġhanīmat haiñ

ham bhī vahm hī hoñge vahm agar nahīñ hoñge

ye jatā diyā āḳhir mujh ko mere ajzā ne

apne aap meñ rahiye varna bas hamīñ hoñge

dil mirā mudabbir hai band-o-bast-e-ālam kā

mas.ale kahīñ ke hoñ faisle yahīñ hoñge

mere saath aa.e haiñ mere saath jā.eñge

hoñ jahāñ qadam mere rāste vahīñ hoñge

vaqt kī savārī par jo rukī huī hogī

fāsle karūñgā tai jo kahīñ nahīñ hoñge

rañg-o-nūr partav haiñ jin kī tāb-kārī ke

tīrgī ke vo jalve kitne dil-nashīñ hoñge

sochiye to sahrā hai Dūbiye to dariyā hai

ek din 'muhib' sāhab jis ke tah-nashīñ hoñge

be-tahi yahi hogi ye jahan kahin honge

sath kaTne wale sath-afrin honge

aaftab haT jae jhilmilane wale hi

aasman-e-viran mein raunaq aafrin honge

zindagi manane ko wahm bhi ghanimat hain

hum bhi wahm hi honge wahm agar nahin honge

ye jata diya aaKHir mujh ko mere ajza ne

apne aap mein rahiye warna bas hamin honge

dil mera mudabbir hai band-o-bast-e-alam ka

masale kahin ke hon faisle yahin honge

mere sath aae hain mere sath jaenge

hon jahan qadam mere raste wahin honge

waqt ki sawari par jo ruki hui hogi

fasle karunga tai jo kahin nahin honge

rang-o-nur partaw hain jin ki tab-kari ke

tirgi ke wo jalwe kitne dil-nashin honge

sochiye to sahra hai Dubiye to dariya hai

ek din 'muhib' sahab jis ke tah-nashin honge