be-zabani zaban ho ke rahi

be-zabānī zabān ho ke rahī

har nazar dāstān ho ke rahī

jis pe rakkhā kabhī qadam ham ne

vo zamīñ āsmān ho ke rahī

jise ḳhūn-e-jigar se sīñchā thā

vo tamannā javān ho ke rahī

rang laayā kisī kā jazb-e-ḳhulūs

vo nigah mehrbān ho ke rahī

maut pe kuchh na bas chalā us kā

zindagī be-nishān ho ke rahī

uzr dil ne hazār pesh kiye

vo nazar bad-gumān ho ke rahī

ham samajhte rahe use ik khel

zindagī imtihān ho ke rahī

un se milne kī aarzū 'tālib'

mere qālib meñ jaan ho ke rahī

be-zabani zaban ho ke rahi

har nazar dastan ho ke rahi

jis pe rakkha kabhi qadam hum ne

wo zamin aasman ho ke rahi

jise KHun-e-jigar se sincha tha

wo tamanna jawan ho ke rahi

rang laya kisi ka jazb-e-KHulus

wo nigah mehrban ho ke rahi

maut pe kuchh na bas chala us ka

zindagi be-nishan ho ke rahi

uzr dil ne hazar pesh kiye

wo nazar bad-guman ho ke rahi

hum samajhte rahe use ek khel

zindagi imtihan ho ke rahi

un se milne ki aarzu 'talib'

mere qalib mein jaan ho ke rahi