beDi ye mere panw mein pahna to rahe ho

beḌī ye mire paañv meñ pahnā to rahe ho

phir ahd-e-ḳhudī toḌ ke tum jā to rahe ho

palkoñ kī muñDeroñ pe parindoñ ko uḌaao

taslīm kiyā tum mujhe samjhā to rahe ho

pachhtāvā na ho kal ye qadam soch ke lenā

jazbāt meñ ulfat kī qasam khā to rahe ho

samjhāyā thā kal kitnā magar baaz na aa.e

kyā hogā abhī maanā ki pachhtā to rahe ho

rahne bhī abhī dījiye ashkoñ kā takalluf

jab jānte ho dil pe sitam Dhā to rahe ho

ab ek na.e tarz-e-rifāqat pe amal ho

tum biich meñ logoñ ke bhī tanhā to rahe ho

kal Thokaroñ meñ jag kī kahīñ chhoḌ na denā

ik dard-zada shaḳhs ko apnā to rahe ho

insān kabhī rizq se bhī sair huā hai

taqdīr meñ thā jitnā likhā pā to rahe ho

is meñ bhī koī ramz koī falsafa hogā

'hasrat' jī abhī jhuum ke tum gā to rahe ho

beDi ye mere panw mein pahna to rahe ho

phir ahd-e-KHudi toD ke tum ja to rahe ho

palkon ki munDeron pe parindon ko uDao

taslim kiya tum mujhe samjha to rahe ho

pachhtawa na ho kal ye qadam soch ke lena

jazbaat mein ulfat ki qasam kha to rahe ho

samjhaya tha kal kitna magar baz na aae

kya hoga abhi mana ki pachhta to rahe ho

rahne bhi abhi dijiye ashkon ka takalluf

jab jaante ho dil pe sitam Dha to rahe ho

ab ek nae tarz-e-rifaqat pe amal ho

tum bich mein logon ke bhi tanha to rahe ho

kal Thokaron mein jag ki kahin chhoD na dena

ek dard-zada shaKHs ko apna to rahe ho

insan kabhi rizq se bhi sair hua hai

taqdir mein tha jitna likha pa to rahe ho

is mein bhi koi ramz koi falsafa hoga

'hasrat' ji abhi jhum ke tum ga to rahe ho