begana-e-manzil wo nahin rahguzar mein

begāna-e-manzil vo nahīñ rāhguzar meñ

jis ke liye ārām hai ālām safar meñ

rakkhe na basīrat kā tavāzun jo nazar meñ

DhūñDegā faqat aib hī vo kār-e-hunar meñ

girdāb se laḌte haiñ jo girdāb ke ghar meñ

sāhil unheñ miltā hai samundar ke safar meñ

aa.ī haiñ taḳhayyul ke do-āba se havā.eñ

tūfāñ jo subuk-sair hai dariyā-e-hunar meñ

yuuñ dard kā sūraj mirī rag rag meñ samāyā

garmī-e-vafā phail ga.ī dil ke khañDar meñ

ḳhalvat ko tirī yaad kī purvā.ī jo bhaa.ī

phūle hue gulzār kā manzar hai nazar meñ

har jins-e-girāñ-qadr kā ehsās jinheñ hai

rakhte haiñ vahī dil kā lahū dīda-e-tar meñ

ġhunche jo ġham-e-hijr ke mausam ne khilā.e

misl-e-gul-e-shādāb mahakte haiñ jigar meñ

vo log ujāle ke nigah-dār kahāñ haiñ

sirf aaya nazar daaġh jinheñ rū-e-qamar meñ

ai kushta-e-ummīd na jā paas tū us ke

pattoñ ke sivā kuchh bhī nahīñ bāñjh shajar meñ

vallāh mohabbat kā bharam hai to unhīñ se

badnām-e-zamāna jo haiñ duniyā kī nazar meñ

āshufta-mizājī kā bhī sāmāñ ise kahiye

vo ātish-e-ḳhāmosh jo ḳhufta hai sharar meñ

kuchh garmī-e-bāzār-e-vafā hai to unhīñ se

saudā-e-junūñ-ḳhez liye jo bhī haiñ sar meñ

hushiyār-o-ḳhabar-dār sar-e-rāh musāfir

aaseb kā ḳhatra bhī hai pariyoñ ke nagar meñ

zulmat hī nahīñ ḳhāna-e-iflās meñ 'nādim'

iḳhlās-o-sharāfat kā ujālā bhī hai ghar meñ

begana-e-manzil wo nahin rahguzar mein

jis ke liye aaram hai aalam safar mein

rakkhe na basirat ka tawazun jo nazar mein

DhunDega faqat aib hi wo kar-e-hunar mein

girdab se laDte hain jo girdab ke ghar mein

sahil unhen milta hai samundar ke safar mein

aai hain taKHayyul ke do-aba se hawaen

tufan jo subuk-sair hai dariya-e-hunar mein

yun dard ka suraj meri rag rag mein samaya

garmi-e-wafa phail gai dil ke khanDar mein

KHalwat ko teri yaad ki purwai jo bhai

phule hue gulzar ka manzar hai nazar mein

har jins-e-giran-qadr ka ehsas jinhen hai

rakhte hain wahi dil ka lahu dida-e-tar mein

ghunche jo gham-e-hijr ke mausam ne khilae

misl-e-gul-e-shadab mahakte hain jigar mein

wo log ujale ke nigah-dar kahan hain

sirf aaya nazar dagh jinhen ru-e-qamar mein

ai kushta-e-ummid na ja pas tu us ke

patton ke siwa kuchh bhi nahin banjh shajar mein

wallah mohabbat ka bharam hai to unhin se

badnam-e-zamana jo hain duniya ki nazar mein

aashufta-mizaji ka bhi saman ise kahiye

wo aatish-e-KHamosh jo KHufta hai sharar mein

kuchh garmi-e-bazar-e-wafa hai to unhin se

sauda-e-junun-KHez liye jo bhi hain sar mein

hushiyar-o-KHabar-dar sar-e-rah musafir

aaseb ka KHatra bhi hai pariyon ke nagar mein

zulmat hi nahin KHana-e-iflas mein 'nadim'

iKHlas-o-sharafat ka ujala bhi hai ghar mein