beja takallufat mein kuchh bhi nahin bacha

bejā takallufāt meñ kuchh bhī nahīñ bachā

had darja ehtiyāt meñ kuchh bhī nahīñ bachā

ab tum hamāre haath ko aa.e ho thāmne

ab to hamāre haath meñ kuchh bhī nahīñ bachā

zinda huuñ ek ḳhvāb aur ik aas ke tufail

varna to is hayāt meñ kuchh bhī nahīñ bachā

malbe sameTne meñ guzārī tamām 'umr

mā'mūl-e-hādsāt meñ kuchh bhī nahīñ bachā

science ne lā-shu'ūr kī parteñ bhī khol diiñ

paḌhne ko nafsiyāt meñ kuchh bhī nahīñ bachā

pesh-e-nazar rumūz-e-virāsat na rakh sake

had-darja iltifāt meñ kuchh bhī nahīñ bachā

ab kī to baat aur hai varna bichhaḌte vaqt

lagtā thā kā.enāt meñ kuchh bhī nahīñ bachā

beja takallufat mein kuchh bhi nahin bacha

had darja ehtiyat mein kuchh bhi nahin bacha

ab tum hamare hath ko aae ho thamne

ab to hamare hath mein kuchh bhi nahin bacha

zinda hun ek KHwab aur ek aas ke tufail

warna to is hayat mein kuchh bhi nahin bacha

malbe sameTne mein guzari tamam 'umr

ma'mul-e-hadsat mein kuchh bhi nahin bacha

science ne la-shu'ur ki parten bhi khol din

paDhne ko nafsiyat mein kuchh bhi nahin bacha

pesh-e-nazar rumuz-e-wirasat na rakh sake

had-darja iltifat mein kuchh bhi nahin bacha

ab ki to baat aur hai warna bichhaDte waqt

lagta tha kaenat mein kuchh bhi nahin bacha