bekal hai mukh nigah mein boson ki pyas hai

bekal hai mukh nigāh meñ bosoñ kī pyaas hai

kuchh to batā tū kis se bichhaḌ kar udaas hai

tasvīr meñ jhukā hai nadī par kadam kā peḌ

paanī meñ pairtā huā but be-libās hai

terī qasam ki tujh ko banā kar matā-e-zīst

ab koī aarzū hai na ab koī aas hai

khultī hai roz shaam ko ik champa.ī dhanak

gaañv ke us makāñ pe jo dariyā ke paas hai

kamre kī shelf par hai sajī budh kī mūrtī

gul-dān meñ chunī huī jañgal kī ghaas hai

dekhūñ tujhe to ruuh kā sahrā sulag uThe

chāhūñ tujhe to terī lagan meñ miThās hai

juuḌe kī qaus meñ guñdhe kuchh māltī ke phuul

saaḌī kī silvaToñ meñ lavandar kī baas hai

bekal hai mukh nigah mein boson ki pyas hai

kuchh to bata tu kis se bichhaD kar udas hai

taswir mein jhuka hai nadi par kadam ka peD

pani mein pairta hua but be-libas hai

teri qasam ki tujh ko bana kar mata-e-zist

ab koi aarzu hai na ab koi aas hai

khulti hai roz sham ko ek champai dhanak

ganw ke us makan pe jo dariya ke pas hai

kamre ki shelf par hai saji budh ki murti

gul-dan mein chuni hui jangal ki ghas hai

dekhun tujhe to ruh ka sahra sulag uThe

chahun tujhe to teri lagan mein miThas hai

juDe ki qaus mein gundhe kuchh malti ke phul

saDi ki silwaTon mein lawandar ki bas hai