bekasi ka ajib aalam hai

bekasī kā ajiib aalam hai

ham-navā hai na koī ham-dam hai

hāl-e-dil apnā maiñ kahūñ kis se

rāz-dāñ hai na koī mahram hai

jism hai chūr-chūr zaḳhmoñ se

jis kā darmāñ na koī marham hai

kuchh batāo to mājrā kyā hai

hoñT hañste haiñ aañkh pur-nam hai

ham bhī pahuñcheñge apnī manzil par

azm-e-rāsiḳh hai sa.i-e-paiham hai

gulsitāñ kā ma.aal kyā hogā

bāġhbāñ kā mizāj barham hai

koī samjhe agar to kyā samjhe

un kī har ek baat mub.ham hai

zindagī kahtī hai jise duniyā

yā to sho.ala hai yā vo shabnam hai

tīrgī baḌh rahī hai ai 'anjum'

sab charāġhoñ kī lau jo maddham hai

bekasi ka ajib aalam hai

ham-nawa hai na koi ham-dam hai

haal-e-dil apna main kahun kis se

raaz-dan hai na koi mahram hai

jism hai chur-chur zaKHmon se

jis ka darman na koi marham hai

kuchh batao to majra kya hai

honT hanste hain aankh pur-nam hai

hum bhi pahunchenge apni manzil par

azm-e-rasiKH hai sai-e-paiham hai

gulsitan ka maal kya hoga

baghban ka mizaj barham hai

koi samjhe agar to kya samjhe

un ki har ek baat mubham hai

zindagi kahti hai jise duniya

ya to shoala hai ya wo shabnam hai

tirgi baDh rahi hai ai 'anjum'

sab charaghon ki lau jo maddham hai