betab hamara zauq-e-nazar gar un ke muqabil aa jae

'betāb' hamārā zauq-e-nazar gar un ke muqābil aa jaa.e

vo parda-nashīñ hoñ mahmil meñ to sāmne mahmil aa jaa.e

maiñ rāh-e-talab meñ sargardāñ is aas pe yaañ tak pahuñchā huuñ

is gaam pe manzil aa jaa.e us gaam pe manzil aa jaa.e

ai kātib-e-qismat ye to batā kyā ye hī hai taqdīr mirī

ik mushkil se chhuTkārā ho to dūsrī mushkil aa jaa.e

yuuñ pyaar bharī nazroñ se mujhe dekho na ḳhudārā baaz aao

ilzām na denā phir mujh ko gar tum pe mirā dil aa jaa.e

'betāb' ye koī jiinā hai ham jaise ġham ke māroñ kā

har lamha yahī ik ḳhatra rahe kab jaane qātil aa jaa.e

'betab' hamara zauq-e-nazar gar un ke muqabil aa jae

wo parda-nashin hon mahmil mein to samne mahmil aa jae

main rah-e-talab mein sargardan is aas pe yan tak pahuncha hun

is gam pe manzil aa jae us gam pe manzil aa jae

ai katib-e-qismat ye to bata kya ye hi hai taqdir meri

ek mushkil se chhuTkara ho to dusri mushkil aa jae

yun pyar bhari nazron se mujhe dekho na KHudara baz aao

ilzam na dena phir mujh ko gar tum pe mera dil aa jae

'betab' ye koi jina hai hum jaise gham ke maron ka

har lamha yahi ek KHatra rahe kab jaane qatil aa jae